خبرتیا

درنو لیکوالو ته دخبریال ډاټ کام ادارې ځانګړې خبرتیا !

خبریال ویبپاڼې اداره خپلو لوستونکو ، لیدونکو ، مینه والو او په ځانګړي ډول ټولو پښتنو لیکوالو ته په ډېر درنښت خبر ورکوي چې په افغانستان کې په جګړه بوختو ځینو دجاسوسي ادارو په مستعارو نومونو دپښتنو دمشرانو دبې پته کولو لپاره په پښتو ژبه واکمن کسان په دندو ګومارلي دي . خبریال ویبپاڼې ته رارسېدلي معلومات ښيي چې دا کسان به په افغانستان کې دپښتني سیاست والو، لیکوالو، ژورنالیسټانو ، لوړپوړو حکومتي مامورینو او هم دا راز پښتني څېرو دبدنامه ولو لپاره کار او هڅه کوي. دوی به خپلې لیکنې دپښتو رسنیو له لاري خپروي ، څو وکولای شي خپلو شومو اهدافو ته ځانونه ورسوي . 

دا چې موږ په دغه لویه او ستره ګناه کې شامل نشو او دخپلي ژبي او ولس سره مو خیانت نه وي کړی ، دخبریال ادارې پرېکړه کړې چې دهیڅ یوه هغه لیکوال لیکنه نه خپروي چې بشپړ هویت یې معلوم نه وي .

هیله ده دخبریال ویبپاڼې دادارې دا پرېکړه هغه افغان لیکوال هم نا هیلي نکړي چې په مستعارو نومونو لیکنې کوي‌. 

هغه لیکوال چې دځینو ستونزو له کبله خپل هویت نه ښيي ، کولای شي‌ چې دخبریال ادارې ته ځان وروپېژني او بیا په مستعار نوم لیکنې وکړي‌. ددوی هویت به دتل لپاره خوندي او دخبریال له ادارې سره امانت وي . 

موږ دا ژمنه کوو چې دهیڅ ډول فشار په وړاندي به دهغه لیکوال هویت ښکاره نکړو چې اداره یې پېژني او هغه کس نه غواړي چې نورو ته وروپېژندل شي . 

زموږ هیله داده چې په افغانستان کې دیوه بې پرې او ریښتوني ژورنالیزم په وړاندي به دخبریال ویبپاڼې دا ګام تاسو هم راسره بدرګه کړئ او په خپل هیواد کې به دبیان ریښتونې آزادي ته دلاري په هوارولو ، خپل قام ، ولس او ژبي ته دکار کولو په موخه زموږ مرسته او ملاتړ وکړئ .

له نورو برېښنا پانو او رسنیو نه هم دورته ګام داخیستلو غوښتنه کوو. 

په درنښت 

دخبریال ویبپاڼې چلوونکې ډله