ډي جي براوو د کرونا په اړه سندره ویلې
خبریال وېب پاڼه/ په نړۍ کې د کرونا ویروس د چټکې خپرېدنې سره سم، چې د زرګونو کسانو ژوند یې واخیست، د کرکټ، سېنما او یو شمېر نورو برخو مخکښو لوبغاړو د کرونا ویروس سره د مبارزې په پار مرستې اعلان کړې.
یو شمېر هنرمندانو د کرونا ویروس څخه د خوندیتوب او ځان ساتنې په موخه سندرې وویلې.
د وېسټ انډېیز د کرکټ ځلانده ستوري ډي جي براوو هم د کرونا په اړه سندره ویلې،((موږ ماتې نه منو)) او پر یوټیوب یې خپره کړې، چې زیات لیدونکي یې هم اخیستي.
د کرونا په کړکېچن وضعیت کې ډېر شمېر مشهور لوبغاړي، هنرمندان، لیکوالان او شاعران د خپلو سندرو، شعرونو، لیکونو او مرستو له لارې غواړي، خلکو ته روحیه ورکړي او د کرونا ویروس څخه د خوندیتوب لپاره ورته د ځان ساتنې پیغام وړاندې کوي.
د لرې برې پښتونخوا هنرمندانو هم د کرونا ویروس څخه د خوندیتوب او ځان ساتنې په موخه خپلو خلکو ته سندرې ویلي، چې له ډلې یې د لرې برې پښتونخوا مشهور سندرغاړي هارون باچا او ګودر ځاځي سندرې د یادولو وړ دي.
له دې ور ها خوا، د افغانستان د کرکټ ځلاند ستوري راشد خان هم د خپلو بې وزلو او اړمنو خلکو سره د مرستو اعلان وکړ.
په ورته مهال د افغانستان د دوست هېواد هندوستان فلمي او کرکټ لوبغاړو هم د خپلو خلکو سره د مرستو اعلان کړی.
کرونا اوس مهال نړۍ له یو ستر بشري او اقتصادي بحران سره مخ کړې.
تر دې دمه کرونا په ټوله نړۍ کې د څه باندې دېرش زرو کسانو ژوند اخیستی، په زرګونه ترې اغېزمن دي او ډېرو سره بیا ژوند یاري کړې، ترې رغېدلي او خپلو کورونو ته ستانه شوي.
په ورته وخت د یو شمېر راپورونو له مخې ویل کیږي، روسیې د کرونا ویروس ضد بریالي درمل جوړ کړي.
دا درمل د روسیې د بیولوژیکي او طبي چارو روغتیا پالانو له لوري جوړ شوي، چې د انسان په حجرو کې د کرونا ویروس له پښو غورځوي او پرمختګ ته یې نه پرېږدي.