پښتون ژغورنې غورځنګ د افغان نجونو د زده کړو لپاره غږ اوچتوي
د پښتون ژغورنې غورځنګ به په يو احتجاج کې د افغان نجونو د زده کړو لپاره غږ اوچت کړي. او همدا راز پر پاکستان غږ کوي چې د ترهګرو ډلو ملاتړ بس کړي.
د غورځنګ مشر منظور پښتين پریکړه کړې چې د افغان نجونو د ښوونځيو د پرانيستلو او دوی ته د زده کړو د غږ اوچتولو لپاره د فرانسې په پلازمېنه پاريس ښار کی تر ټولو لوی احتجاج او لاريون راوباسي.
د افغان نجونو د حق لپاره دې لاريون سره به ډېر کسان يو ځای شي. او د لاريون پر مهال به په پاکستان هم غږ وکړي چې د ترهګرو ډلو له ملاتړ لاس واخلي.
د پښتون ژغورنې غورځنګ داسې مهال د افغان نجونو د ښوونځيو د پرانيستلو لپاره غږ اوچتوي چې طالبانو د سلګونو ورځو راهيسي له شپږم ټولګي پورته د نجونو پر مخ ښوونځي تړلې دي.
طالبان افغان وس ته بار بار د ښوونځيو ژر پرانيستلو ژمنه ورکوي خو تر اوسه يې په خپلو ژمنو وفا نه ده کړې.
نړيوال له طالبانو غواړي چې ژر تر ژره دې له شپږم ټولګي پورته د نجونو پر مخ ښوونځي پرانيزي خو طالبان بهانې کوي.
خبريال ډاټ کام ته د طالبانو له منځه ځينو سرچينو ويلي چې د دوی مشرتابه پرېکړه کړې څو چې نړيوال د طالبانو حکومت په رسمیت ونه پیژني دوی د نجونو ښوونځي نه پرانيزي او دا د دوی د مشرتابه وروستۍ پرېکړه ده.
د افغان نجونو د زده کړو لپاره په نړيواله کچه لاريونونه وشول او د فعالانو له خوا د نجونو د زده کړو په ملاتړ غږ پورته شو خو طالبان پرې غوږ هم نه ګروي.