د ۱۸ افغان پناه غوښتونکو جسدونه هېواد ته راوړل شول
خبریال وېبپاڼه: د طالبانو د بهرنیو چارو وزارت اعلان کړی چې په بلغاریا کې په یوه کانټینر کې د وژل شویو ۱۸ افغان کډوالو جسدونه یې هېواد ته راوړل شوي دي.
د دغه وزارت د ویاند مرستیال ضیا احمد تکل ویلي، چې د افغان کډوالو جسدونه نن هېواد ته راوړل شوي دي.
د دغو کډوالو جسدونه د طالبانو د عامې روغتیا وزارت له خوا خپلو سیمو ته انتقال شوي دي.
طالبانو د دغو جسدونو د سپارلو د ځنډ لامل د ترانزیتي شرکتونو د پیسو د لګولو په برخه کې د بلغاریا د حکومت ورو قضايي بهیر او د بانکونو محدودیتونه بللي دي.
طالبانو له خلکو غوښتي چې په ناقانونه توګه اروپايي هېوادونو ته لاړ نه شي.
د جمعې په ورځ، د همدې کال د فبرورۍ ۱۷مه د ۱۸ افغان کډوالو مړي د بلغاریا د پلازمېنې صوفیا په څنډه کې په یوه لارۍ کې وموندل شول، چې د اکسیجن د نشتوالي له امله مړه شوي وو.
په وژل شویو کې یو شپږ کلن ماشوم هم شامل دی.
په هغې ورکه شوې لارۍ کې چې د دغه هېواد د پولیسو له خوا کشف شوه، ۵۲ کډوال چې ډېری یې افغانان وو، د بلغاریا له لارې لوېدیځې اروپا ته د تلو لپاره په ځنګلونو کې پټ وو.