د پي ټي ایم پر مخکښ مشر علي وزیر مقدمه درج شوې
خبریال ډاټ کام: په پاکستان کې د پښتون ژغورنې غورځنګ د مشر منظور پښتین د خلاصون وروسته دا ځل د دې غورځنګ په بل مخکښ مشر علي وزیر باندې هم په چارسده کې مقدمه درج شوې، خو د نیولو په اړه یې لا څه نه دي ویل شوي.
د معلوماتو له مخې په علي وزیر هغه مهال مقدمه درج شوې ده چې هغه د مارچ پر لومړۍ نېټه په چارسده کې د “پي ټي ایم” یوې لویې ولسي غونډې ته د وینا پر مهال د ریاست او ریاستي ادارو پر ضد څرګندونې کړې وې.
ویل کېږي چې په علي وزیر یاده مقدمه د چارسدې په پړانګ تاڼه کې درج شوې ده، خو په مقدمه کې د هغه د نیولو پر موخه څه نه دي ویل شوي او د سیمي پولیسو هم ویلي دي چې پر علي وزیر صرف مقدمه درج شوې.
د چارسدې سیمي پولیس ادعا کوي چې پر علي وزیر یوازې مقدمه درج شوې او د نیولو په اړه یې دوی ته هیڅ راز سپارښتنه نه ده شوې، خو دوه نور کسان بیا د پاکستاني بیرغ د څیري کولو له امله زنداني شوي دي.
علي وزیر د دې مقدمې په اړه په خپله څه نه دي ویلي او نه هم د پښتون ژغورنې غورځنګ کوم بل مشر یې په اړه څرګندونې کړي دي.
علي وزیر د منظور پښتین را وروسته د پښتون ژغورنې غورځنګ مخکښ مشر بلل کېږي چې ډیری وخت بې له کوم ډاره د پاکستاني ریاست پر ضد څرګندونې کوي.
علي وزیر تل د ریاست پر ضد په ډیر ډاډه زړه غږیږي او په پښتنو د ریاست له لوري له شویو ظلمونو یې پرده پورته کړې او لاهم په دغو مبارزو بوخت دی.
علي وزیر د تېر کال روژې میاشتې په پای کې هم د پښتون ژغورنې غورځنګ د هغه لاریون وروسته نیول شوی و چې په خړ کمر سیمه کې شوی و، خو لاهم د ریاست پر ضد په څرګندونو بوخت دی.
علي وزير هغه مهال د محسن داوړ سره یوځای نیول شوی و هغه وخت پر محسن داوړ او علي وزیر پاکستاني حکومت تور پورې کړی و چې ګواکې په پوځیانو یې د لاریون پر مهال ډزې کړې وې.
په پاکستان کې د پښتون ژغورنې غورځنګ غړي په دې وروستیو کې ډیر ځلي نیول کېږي، څه د پاڅه میاشت وړاندې د دې غورځنګ مشر منظور پښتین هم نیول شوی و چې یوازې یوه اونۍ وړاندې راخوشې کړی شو.
په پښتین هم تور لګول شوی و چې ګواکې د پاکستان آئین، پوځ او ریاستي ادارو پر ضد یې څرګندونې کولې، خو پي ټي ایم د ریاست ادعا بې بنسټه بللې وه او ویلي وو چې د دې غورځنګ مشران او غړي ځکه نیول کېږي چې د ریاستي ادارې د ظلمونو پرده پورته کوي او د پښتنو حقوق غواړي.
منظور پښتین د لر او بر په ګډون په ټوله نړۍ کې له پرله پسې احتجاجونو وروسته پاکستاني ریاست له زندانه خوشې کړ چې د ازادیدو سره سم یې د ریاست د ظلمونو پر ضد لومړنۍ څرګندونې هم وکړې.
منظور پښتین وویل، چې د غورځنک په مشرانو او غړو مقدمې درج کول او زنداني کول به هیڅ کله هم د دوی مبارزه کمزورې نه کړي، بلکې لا به انرژي ورکړي.