طالبانو د دایکندي کجران ولسوالۍ پورې اړوند د سورلۍ ډک موټرونه برمته کړي
خبریال وېب پاڼه/ طالبانو په هلمند ولایت کې د خپل کنټرول لاندې سیمه کې د دایکندي کجران ولسوالۍ پورې اړوند د مسافرو ډک موټرونه برمته کړي.
په دې موټرونو کې د مسافرینو شمېر ٥٣ تنو ته رسیږي چې ٣٥ ښځې او ماشومان هم په کې شامل دي.
د دایکندي امنیه قومندان غلام سخي غفوري وایي، چې طالبانو له سورلۍ ډک ١٥ موټرونه برمته کړي، خو د دایکندي د ولایتي شورا رییسې شیما رستمیان هم خبریال وېب پاڼې ته دا پېښه تایید کړې خو نوموړې د سورلۍ موټرونو شمېر ٢٧ ښودلی دی.
طالب وسله والو په دې خاطر دا موټرونه ودرولي، چې څو ورځې وړاندې د دوی د ولکې لاندې له سیمې یوه انجلۍ د کجران ولسوالۍ له یو هلک سره وتښتېده او کجران ولسوالۍ ته دننه شول.
د انجلۍ مور او پلار طالبانو ته عارض شول او طالبانو اوس د دې کار په بدل کې د دایکندي د کجران ولسوالۍ مسافرین برمته کړي دي.
طالبانو ویلي، تر څو هلک او انجلۍ دوی ته تسلیم نه شي، برمته شوي مسافرین نه خوشې کوي.
لا هم د کجران ولسوالۍ د مشرانو خبرې له طالبانو سره دوام لري، تر څو برمته شوي کسان خوشې کړي.
دا لومړی ځل نه دی چې طالبان مسافر ځوروي، بلکې په ځلونه یې د مسافرینو موټرونه درولي او مسافرین یې برمته کړي دي.
د دې تر څنګ طالبان د خپل کنټرول لاندې سیمو کې په مېرمنو او نجونو د صحرایي محکمې حکمونه عملي هم کوي.
د طالبانو تر کنټرول لاندې ساحو کې د ورته پېښو په ترسره کېدو سره تل د طالبانو له لوري نجوني یا مېرمنې په صحرا کې په ډېرې بې رحمۍ سنګسار شوي دي.