امریکا د داعش مشر پیدا کولو ته دوه برابره جایزه اعلان کړه
خبریال وېب پاڼه/داعش تره ګره ډله چې په منځني ختیځ کې لا هم پراخ فعالیت لري او هره ورځ سلګونه کسانو ته مرګ ژوبله اړوي، امریکا یې د رهبر په لټه کې ده.
امریکا په خپل یوه تازه بیان کې ویلي دي چې د داعش د رهبر په پیدا کولو کې که چا ورسره د سمو اطلاعاتو مرسته وکړه، د اعلان شوې جایزې دوه برابره به ورکړي.
د داعش ترهګرې ډلې نوی مشر چې محمد عبدالرحمن مولا سلبي نومېږي، وړاندې تر دې چې د داعش ډلې مشر وټاکل شي، د دغې اورپکې ډلې د مشر ابوبکر بغدادي ولیعهد ؤ. هغه مهال امریکا د نوموړي د پیدا کولو لپاره ۵ ملیونه ډالره جایزه ټاکلې ده.
کله چې د داعش مشر ابوبکر بغدادي د تېر ۲۰۱۹ ز کال په اکتوبر کې د امریکا لخوا ووژل شو، ورسره هم مهاله دغې ترهګرې ډلې محمد عبدالرحمن د خپلې ډلې مشر اعلان کړ.
دا په داسې حال کې ده چې په دې وروستیو کې منځی ختیځ او افغانستان د تاریخ په یوه تریخ پړاو کې را ګیر دي چې هره ورځ یې په یوه او بل نوم زرګونه کسان وژل کېږي.
په افغانستان کې هم د پخوا په پرتله د دغې ترهرګې ډلې فعالیتونه زیات شوي دي. که څه هم ځینې سیاسي شنونکي دا یوه لوبه ګڼي او وایي چې یوازې د وسله والو طالبانو د بیرغ بدلولو هڅه روانه ده خو په ورته وخت کې ځینې پخواني حکومتي چارواکي وایي چې که د داعش فعالیتونه په افغانستان کې زیاتېږي، نو د جګړې د یوه بل فصل د پرانیستلو امکان هم شته دی.
اوس مهال افغان حکومت له وسله والو طالبانو سره د بین الافغاني مذاکراتو لپاره د یوې دایمي او تلپاتې سولې په درشل کې دی خو په دې وروستیو کې د کرونا وبا له امله یاد شوي فعالیتونه هم کمرنګ شوي دي، خو په هېواد کې د جګړې زور زیات شوی دی او هره ورځ افغانان له دریو خواوو وژل کېږي.
ویل کېږي د داعش نوی مشر مولا سلبي په ۱۹۷۶ ز کال کې زیږېدلی دی. د راپورونو له مخې دغه ترهګر مشر د خلکو په تښتونه او عام وژنه کې لاس درلود، چې له ډلې یې په عراق کې د ایزیدیان د نسل وژنې یادونه شوې ده.
دغه ترهره ډله له عام وژنې سربېره د اقلیتونو ښخې ورته برمته کوي او د وینځې استفاده ورڅخه کوي. ملا سلبي په عراق کې زیږېدلی دی او له ترکمن قوم څخه دی.