رویا رحماني د فساد په تور له واشنګټنه کابل ته غوښتل شوې
خبریال وېب پاڼه/ یوې حکومتي سرچینې خبریال ډاټ کام ته وویل چي د امریکا متحده ایالتونو لپاره د افغانستان سفیره رویا رحماني د سفارت د دېوال په قضیه کې د مالي فساد له امله د لويي څارنوالۍ له خوا کابل ته غوښتل شوې او ورته ویل شوي چي د وږي (سنبلې) پر درېیمه باید کابل کې حاضره اوسي.
بله خوا ویل کېږي چې رویا رحماني د اداري کارکوونکو سره په مجلسونو کې د ولسمشر محمد اشرف غني پر آدرس اخطاریه څرګندوني کړي، چې که یې د څارنوالۍ له منګولو خلاصه نه کړي نو دا به یې هم د مالي فساد هغه مسایل افشا کړي چې تر اوسه نه دي افشا شوي.
اټکل کېږي چې ولسمشر به د کابل ښاروالۍ، عامي روغتیا وزارت او واشنګټن سفارت د فساد څېړلو په پایله کې مجرمین محاکمه کړي او کاري رپوټ به یې نړیوالې ټولنې ته د خپلې لاسته راوړنې په توګه وړاندې کړي. خو که د رویا رحماني او ورسره ښکېلو مسئولینو پر قضیه سترګې پټې شي، دا به د سفیرې رحماني د اخطارونو پر حقانیت دلالت وکړي چې ګواکې ولسمشر پخپله د نوموړې سره ګوتي پټې کړیدي.
د تېرې جولای میاشتې پر ۱۱مه په واشنګټن کې د افغان سفارت د یوه ۸۸ متره دېوال په قضیه کې د نږدې دوه میلیونه ډالرو د فساد تر سندونو خپرېدولو وروسته، تر اوسه د سفیرې رحماني د ګوښه کولو په هکله حکومت انتظار کړی دی، په داسې حال کې چې په مسکو کې د افغان سفیر دوکتور لطیف بهاند پر ګوښه کولو یوه ورځ هم انتظار نه شو.
د کتونکو په باور ولسمشر یوازې د پښتنو په وړاندې قاطعیت څرګندوي، هغه که د توطیو په بنسټ هم وي.
ویل کېږي چې رویا رحماني د سفارت سره د خپلي شخصي غیري دولتي ادارې (ان جي او) په څېر چلند کوي، دکتاتورانه حرکتونه کوي، د افغانستان سره بلدیت نه لري او د ارزښتونو سره یې لېوالتیا نه لري.
رویا رحماني چې د کاناډا اوسېدونکې افغانه ده ؛ تر دې وړاندي هم په ورته کړنو تورنه بلل شوې ده، پر نوموړې تور دی چې ژبني اورته لمن وهي او اکثره پرېکړي د خپلو شخصي ګټو پر بنیاد کوي.
واشنګټن ډي سي کې د افغانستان د اوسنۍ سفیرې رویا رحماني د اداري فساد په هکله تر دې وړاندي دخبریال ډاټ کام د پرله پسې راپورونو او معتبرو سندونو خپرېدو په دوام، د افغانستان تلویزوني شبکو هم تېر کال نوي افشا ګرۍ وکړې.