امریکا او نړیواله ټولنه به مذاکرات له نزدې څاري
خبریال وېب پاڼه/ د امریکا د بهرنیو چارو وزارت پرون شپه ناوخته په یوه اعلامیه کې ویلي، چې د سولې لپاره باید افغان حکومت او طالبان په لاس راغلې موقع او وخت ضایع نه کړي او کوټلي ګامونه پورته کړي.
د امریکا د بهرنیو چارو وزارت همدا راز ویلي، چې امریکا او نړیواله ټولنه به د افغانانو خپل منځي خبرې له نزدې وڅاري.
د امریکا بهرنیو چارو وزارت ویلي، امریکا به د اړتیا په صورت کې د بین الافغاني مذاکراتو او افغان سولې بهیر کې ورسته وکړي.
یادې اعلامیې کې دا راز د افغان حکوما او طالبانو سره له هغې ژمنې یادونه شوې، چې د افغانستان له خاورې پر امریکا د ترهګریزو بریدونو ګواښ نه وي.
د افغانانو خپل منځي خبرې د دواړو لوریو افغان حکومت او طالبانو له خوا پر سبا شنبه تأیید شوي، چې په قطر کې به پیل شي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم پر سبا شنبه د سپټمبر دوولسمه د بین الافغاني مذاکراتو د پیل هرکلی کړی دی.
خلیلزاد پر خپله ټوېټر پاڼه د بین الافغاني مذاکراتو د پیل په تړاو په ټویټ کې وړاندې زیاتونهېکړې چې دا د افغانانو لپاره تاریخي موقع ده، چې باید په سمه توګه ترې ګټه واخلي او ټول سره یو ځای یو سیاسي تفاهم ته ورسیږي.
د سولې بین الافغاني مذاکرات د افغان حکومت او طالبانو له لوري د بندیانو ازادولو بهیر د ځنډېدو له کبله وروسته پاتې شوي وو.
د سولې مشورتي لویې جرګې له پرېکړې وروسته د طالبانو ٨٠ بندیان خوشې شول او پاتې نور یې د افغان حکومت د شرطونو له کبله چې طالبان باید د کومانډو ځواکونو په ګډون د حکومت یو شمېر سرتېري خوشې کړي، د طالب بندیانو د خوشې کولو لړۍ ودرېدله.
افغان حکومت له څو اوونۍ ځنډ وروسته تېره اوونۍ د طالب بندیانو د خوشې کولو لړۍ پیل او پای ته ورسوله.
خو دا چې طالب مشران په پاکستان کې وو، د افغان حکومت د مرکچي پلاوي سفر وځنډېد، چې له امله یې د افغانانو خپل منځي مذاکرات هم وروسته پاتې شول.
تېره ورځ طالبانو یو ځل بیا بهانه وکړه، چې د دوی پوره بندیان نه دي خوشې شوي او په دې توګه یې غوښتل دا بهیر ټکنی کړي.
د طالبانو شپږ هغه بندیان چې د اسټرالیایي او فرلنسوي اتباعو پر وژلو تورن دي، د یادو هېوادونو د مخالفت له وجې خلاص نه شول او قطر ته استول شوي، چې هلته به امریکایي کمپ کې د امریکا تر نظر بند لاندې وي او د فرانسې او اسټرالیا سره د امریکا تر جوړ جاړي وروسته به افغانستان ته را ولېږدول شي او له دې ځایه به ازاد شي.
د یادو شپږو تنو بندیانو له ډلې پنځه د افغانستان د بېلابېلو ولایتونو دي او یو یې پاکستانی وګړی دی.
د سولې بین الافغاني مذاکرات چې سبا شنبه د سپټمبر پر دوولسمه نېټه به د قطر پلازمېنې دوحه کې پیل شي، نن به د عبدالله عبدالله او معصوم ستانکزي په مشرۍ د حکومت مرکچي پلاوی قطر ته روان شي.