fbpx

کابل کې وژل شوی امریکایی پوځي ایالتي ښاروال و

راپورونه وايي، هغه امریکايي پوځي چې کابل کې په یوه داخلي برید کې وژل شوی د امریکا متحده ایالتونو د یوټا ایالت د شمالي اوګدن ښاروال وو.

افغانستان کې د ناټو غوڅ  ملاتړ ماموریت په یوه خبرپاڼه کې ویلي، چې پرون د افغانستان پلازمېنه کابل کې د یوه افغان سرتېري له خوا پر بهرنیو سرتېرو وسله وال برید شوی.

سرچینې زیاته کړې، چې په دغه برید کې یو امریکایي پوځي وژل شوی او یو بل ټپي دي، چې ټپي سرتېری د بګرام روغتون ته وړل شوی او روغتیايي حالت یې ښه دی.

په خبرپاڼه کې راغلي، وژل شوی امریکایي سرتېری برینټ ټایلر نومېږي او پر هغه برید کوونکی افغان سرتېری هم د یوه بل افغان منسوب له خوا وژل شوی دی.

خو په ورته وخت کې سالټ لېک تریبیون او نورو رسنیو راپور ورکړی، چې ۳۹ کلن برینټ ټایلر د شمالي اوګدن ښاروال او له ملي ګارد سره د خدمت په ترڅ کې وژل شوی دی.

ټایلر په ۲۰۰۹ کې د شمالي اوګدن د ښاروالۍ شورا غړی شو او ۲۰۱۳ م کال ښاروال غوره شو، چې د وژل کېدو پخلی یې د شمالي اوګدن ښار د شورا غړي فیلیپ سوانسن کړی دی.

کندهار څانګه