fbpx

امریکا د یوه تړون د عملي کېدو لپاره روسیې ته وخت ورکړی

د امریکا متحده ایالات وايي، که روسیه په دوو میاشتو کې د سړې جګړې د مهال اټمې تړون عملي کېدو ته ستنه نه‎شي، دوی به هم خپل ټول هغه تعهدات وځنډوي چې د دې تړون له مخې ورته ژمن دي.

د امریکا د بهرنیو چارو وزیر مایک پامپئو دا اعلان د سې شنبې په ورځ په بروکسل کې د ناټو د تړون د غړیو هېوادونو په غونډه کې وکړ.

په‎دې غونډه کې د ناټو متحدانو د امریکا د دې تورونو کلک ملاتړ وکړ چې وايي، روسیې د۱۹۸۷میلادي کال د اټمي وسلو له تړونه سرغړاوی کړی.

د منځني واټن د اټمي وسلو تړون روسیه او امریکا دواړه د داسې کروز، یا لېرې واټن ویشتونکو توغندیو له لرلو، تولیدولو یا ځای پر ځای کولو منعه کوي چې له ۵۰۰ څخه تر۵۰۰۰ کیلومترو پورې واټن ویشتلی شي.

په‎داسې حال کې چې د مسکو او لویدیځ ترمنځ ترینګلتیا زیاته شوې، د امریکا ولسمشر ډونالډ ټرمپ په اکټوبر میاشت کې وویل، دا به د اټمي وسلو د کنټرول له دې تړونه ووځي.

نوموړي ویلي، روسیې د توغندیو د نوي سیسټم په تولید له دې تړونه سرغړاوی کړی دی.

روسیې د خپلو «نواتور 9 اېم 729» په نوم د دې کروز توغندیو په اړه ډېر څه نه‎دي ویلي، خو دا یې رد کړې چې ګوندې د دې توغندیو تولید د واشنګټن او مسکو ترمنځ د سړې جګړې د مهال له تړونه سرغړاوی دی