fbpx

نوان پراډیپ د بنګله دېش خلاف له سیالۍ بهر شو

خبریال وېبپاڼه / ۹ جون ۲۰۱۹ – د سریلانکا کریکټ ملي لوبډلې پیاوړی توپ اچوونکی نوان پراډيپ د ښي لاس د ګوتې د ټپ له کبله د بنګله دیش خلاف راتلوونکې سیالۍ څخه بهر شو.

پراډيپ په نیټ کې د تمرین پر مهال کوسال پریرا ته توپ اچونه ترسره کوله او د نوموړي لخوا توپ د هغه د سر په طرف مخامخ ولوبول شو او نوموړي په لاس د سر څخه د دفاع هڅه وکړه چې پایله کې د نوموړي د لاس ګوته سخته ټپي شوه.

د ګوتې د ماتیدو وروسته نوموړی سمدستي روغتون ته وړل شوی او ډاکټرانو ورته د یوې اوونۍ لپاره د لوبو څخه استراحت ورکړی دی.

د نوان پراډيپ نه شتون به په راتلوونکو سیالیو کې د سریلانکا کریکټ ملي لوبډلې لپاره یوه ستره ضربه وي.

نوموړي توپ اچوونکي د افغانستان خلاف په لوبه کې بهترینه توپ اچونۀ ترسره کړي وه چې د ۳۱ منډو په بدل کې یې څلور افغاني لوبغاړي سوځولي و او د لوبې غوره لوبغاړي جایزه یې ترلاسه کړي وه.

که چیرې نوان پراديپ د ټپونه کبله د نړیوال جام سیالیو بهر شي، پر ځای به یې احتیاطي ښي لاسۍ چټک توپ اچوونکی کوشن راجیتا انګلستان ته د سیالیو لپاره سفر وکړي.

د یادونې وړ ده چې سریلانکا کریکټ ملي لوبډله به د راتلوونکي سې شنبې په ورځ د بنګله دیش کریکټ ملي لوبډلې سره د سیالۍ ډګر ته ښکته شي.

له بنګله دیش سیالۍ وروسته به دوی د جون په پنځلسمه نیټه د اسټرالیا خلاف د سیالۍ ډګر ته ووځي.

سریلانکا کریکټ ملي لوبډلې په درې لوبو کې یوه ګټلي، یوه یې بایللي او یوه یې مساوي کړي ده.

عزیزالله عزیزي

Your SEO optimized title page contents