fbpx

غني: د اوبو مدیریت د سېلابونو او وچکالۍ له منځه وړي

خبريال وېبپاڼه / ۱۲ جون ۲۰۱۹ – افغان ولسمشر محمد اشرف غني د چهارشنبې په ورځ د هالنډ شاهي هېواد له پلاوي سره چې د دغه هېواد د اوبو متخصصین هم پکې شامل وو، په ارګ کې وکتل.
د ارګ په اعلاميه کې راغلي، په دې کتنه کې چې د اوبو او انرژۍ وزارت مسوولینو هم حضور درلود، ولسمشر غني یاد پلاوي ته د ښه راغلاست ترڅنګ وویل، د شاهي هالنډ لومړي وزیر سره یې په خپلې وروستۍ کتنه کې له اوبو څخه د استفادې، تجربو شریکولو او همکاریو په اړه خبرې کړې وې او اوس د تخصصي بحثونو لپاره زمینه برابره شوې ده.
ولسمشر غني د اوبو د مدیریت او استفادې په برخه کې د هالنډ بریالیو او عالي تجربو یادونه وکړه او وې ویل، افغانستان اړتیا لري په یادو برخو کې اساسي ظرفیت سازي وکړي. هغه زیاته کړه، افغانستان پرېمانه طبیعي منابع لري او پر اوبو پانګونه د افغانستان د حکومت لومړیتوب دی. ولسمشر زياته کړه د اوبو مدیریت به وکولای شي د سېلابونو او وچکالۍ هغه خبیثه حلقه چې افغانستان یې زیانمن کړی، له منځه یوسي.
یاد پلاوي د اوبو د مهارولو په خاطر د ولسمشر غني د هڅو قدرداني وکړه او وې ویل، هالنډ د اوبو زېرمه کولو د کوچنیو، متوسطو او سترو بندونو د طرحې او جوړولو په برخه کې همکارۍ ته چمتو دی، دغه راز به له افغان متخصصینو سره د تجربو او حرفوي زده کړو د شریکولو په برخه کې هم هراړخیزه همکاري وکړي.