fbpx

ملګري ملتونه: د بشري حقونو خپلواک کمېسیون سره تل همکاري کوو

خبریال وېبپاڼه / ۱۸ جولای ۲۰۱۹ – ملګري ملتونه وايي، د افغانستان د بشري حقونو د خپلواک کمېسیون له نویو غړو سره خپلې همکارۍ ته ادامه ورکوي.

د ملګرو ملتونو په یوې تازه اعلاميه کې راغلي چې د دې کمېسیون د نوې مشرې له اعلانېدو سره سم غواړي ټينګار وکړي چې په افغانستان کې د بشري حقونو په برخه کې به له دې کمېسیون سره د تېر په څېر همکاره وي.

تېره ورځ د افغانستان د بشري حقونو خپلواک کمیسیون مشره سیما سمر د اتلس کلن ماموریت وروسته له دندې ګوښه شوه او پر ځای نن رسمآ شهرزاد اکبر د بشري حقونو خپلواک کمېسیون د نوې رييسې په توګه وټاکل شوه.

سیما سمر له تېرو ۱۸ کلونو راهیسې د افغانستان بشري حقونو خپلواک کمېسیون رییسه پاتې شوې وه، خو په نوموړې له ډیرو کلونو راهیسې نیوکې کېدلې چې ولې دومره وخت په دې ریاست پاتې ده.

اوس نو د ولسمشر غني د یو فرمان له لارې سیما سمر د بشري حقونو او بین المللي اړیکو چارو کې د ولسمشر د ځانګړې استازې او د دولت د وزیرې په توګه ټاکل شوې ده.

د یادولو ده د ميرمن شهرزاد اکبر په مشرۍد بشري حقونو د خپلواک کميسيون په اته تنو نویو ټاکل شویو غړو کې اسدالله یوسفي، بنفشه یعقوبي، محمدایوب یوسفزي ،سیداحسان خلیق، شبنم صالحي، شکرالله مشکور، محمد نعیم نظري او راضیې صیاد شامل دی.

Your SEO optimized title page contents