fbpx

افغان ملي لوبډله د چمتووالي په موخه متحده عربي اماراتو ته ولاړه

خبریال وېبپاڼه / ۲۱ اګست ۲۰۱۹ – د ملي لوبډلې هغه لوبغاړي چې د بنګله دېش پر وړاندې یوازېنۍ ټېسټ لوبې لپاره په ۱۵ کسیزه لوبډله کې اخیستل شوي دي نن د متحده عربي اماراتو پر لوري خوځېدلي د کرکټ بورډ پر وینا دغه لوبغاړي به په ابودبۍ کې د روانې اګست میاشتې له ۲۲ نېټې تر ۲۹مې نېټې پورې خپل تمرینات وکړي او په ۳۰مه به بنګله دېش ته ولاړه شي.

نن د افغانستان کرکټ بورډ عمومي رئیس فرهان یوسفزي او د بورډ نورو مسوولینو د لوبغاړو سره د سفر وړاندې یوه ناسته هم کړې ده په دغې ناسته کې فرهان سفزي لوبغاړو ته وویل: “د ټولو لوبغاړو فزیکي جوړښت، ډسپلین او کارکردګي باید برابره وي، دغه راز باید تاسو په خپل منځ کې بشپړه همغږي ولرئ چې ډسپلین هم له همغږۍ سره پوره تړاو لري.

نوموړي افغان لوبغاړو ته په ډاډ سره وویل چې د دې ترڅنګ په دغې سفر کې کولی شو هر ډول امکانات هم درته برابر کړو چې د کرکټ بورډ هدف او لومړیتوب هم لوبغاړو ته هر ډول اسانتیاوې رامنځته کول دي.

پرون د افغانستان کرېکټ بورډ د غوراوي کمېټې غړو د بنګله دېش خلاف د ټيسټ لوبې دغه راز د درې اړخیزه شل اوریزه لوبلړۍ لپاره دوه بیلابېلې لوبډلې اعلان کړې.

د بنګله دېش پر وړاندې یوازینۍ تاریخي ټيسټ سیالۍ لپاره په پنځلس کسيزه لوبډله کې ځوانو لوبغاړو ظاهر خان پکتین، ابراهيم ځدراڼ، سیید شېرزاد او قیس احمد ته هم چانس ورکړل شوی دی.

پرون د ټېسټ لوبډلې لپاره په پنځلس کسیزه لوبډله کې دا لوبغاړي غوره شو: لوبډلمشر یې راشد خان ، مرستیال یې اصغر افغان، محمد نبي، احسان الله جنت، ابرا هیم ځدراڼ، رحمت شاه، حشمت شهیدي، اکرام علي خېل،
ظاهر خان پکتین، جاوید احمدي، سیید احمد شېرزاد، یامین احمدزی، افسر خان ځاځی، قیس احمد او شاپور ځدراڼ .

دغه رار د دغې ادارې اجراییه مشر لطف الله ستانکزي هم د لوبغاړو سره په ناسته کې د خبرو پر مهال وویل:

((تاسو باید فټنس، پرفرمنس او ډسپلین ته ډېره پاملرنه وکړئ، ځکه دا هغه څه دي چې د لوبغاړو د شخصیت ښکارندویي کوي.))

د ملي لوبډلې لوبډلمشر راشد خان هم ډاډ ورکړ ” چې موږ به په راتلونکو ټولو سیالیو کې د یوې کورنۍ د غړو په توګه د نورو لوبډلو پر وړاندې ولوبېږو، او هیله لرو چې دغه سیالۍ به موږ ګټو او بریا به زموږ وي.

د یادولو ده افغانستان به د کوربه بنګله دېشۍ لوبډلې سره د سپټمبر مياشتې په پنځمه نيټه یوازینۍ تاریخي ټيسټ لوبه ترسره کړي او له هغې وروسته به په درې اړخیزه سيريز کې ګډون وکړي.