fbpx

د هندي کرېکټړ سریسانت په کور کې اور لګیدلی،مرګ ژوبله نه لري

تيره شپه په سيمه ايز وخت د شپې په دوو بجو د هندي کریکټر سريسانت د کور په ښکتني تالار کې اور لګیدلی، خو مرګ ژوبله نه لري.

د اور لګيدو پر مهال په خپله سریسانت په کور کې نه و، خو د هغه ميرمن او دوه ماشومان د کور په لومړي پوړ کې شتون درلود او هغوی ته کوم زيان نه دی رسيدلی.

د اور لګیدو وروسته د هغه ګاونډي ځایي پوليسو ته خبر ورکړ او په بيړې سره پوليس د پيښې ځای ته ورسيدل او سيمه يې کنټرول کړه.

تراوسه د اور لګيدنې د پيښې په اړه جزيات نه دي ورکړل شوي.

سریسانت په ۲۰۱۳ کال ای پي ايل کې د درغلۍ له کبله د هند کريکټ بورډ لخوا د عمري بنديز سره مخ و، خو تيره اوونۍ هند کریکټ بورډ په نوموړي د بنديز موده اوو کلونو ته راښکته کړه، چې د ۲۰۲۰ کال په سپټمبر مياشت کې به پای ته وراسيږي.

نوموړي ويلي وو په دې تيرو شوو کلونو کې يې هر وخت هڅه کړي چې د خپلې بې ګناهۍ ثبوت وړاندي کړي اوس په دې خوښ دی چې د خپلې بې ګناهۍ ثبوت وړاندي کوي او د عمري کریکټ بندیز موده يې اوو کلونو ته راښکته شو.

د يادونې وړ ده چې سریسنات د هند کریکټ ملي لوبډلې لپاره ۲۷ ټيسټ،۵۳ يو ورځنۍ او لس شل اوريزې لوبې کړي او ټولټال يې په کې ۱۶۹ ويکټې اخيستي دي.

عزيزالله عزيزي