fbpx

په روسي ژبه د قران کریم یوازینۍ ژباړونکې مېرمن وفات شوه

خبریال وېبپاڼه / ۴ سپټمبر ۲۰۱۹ – روسي رسنیو خبر ورکړی، چې روسي ژبې ته د قرآن کریم مشهوره ژباړونکې والریا پوروخوا وفات شوې ده.

ډاکټر والریا پوروخوا چې د قرآن کریم مشهوره ژباړونکې وه، د تېرې دوشنبې په ورځ(وږی ۱۱مه) د ۷۶ کلونو په عمر وفات شوه.

والریا پوروخوا په روسیه کې له مسلمان مبلغ ډاکټر محمد سعید الرشد سره تر واده کولو وروسته مسلمانه شوه.

ډاکټر والریا پوروخو تر مسلمانېدو وروسته خپل نوم واړاوه او په ځان یې «ایمان» نوم کېښود او له دې وروسته نوموړې په روسیه کې د ګڼو دیني او خیریه بنسټونو بنسټ کېښود.

والریا په ۱۹۴۰ میلادي کال پیدا شوې او په ۱۹۸۵میلادي کال لومړی مسیحي او وروسته یې بیا د اسلام مقدس دین ومانه.

له دې وروسته نوموړې روسي ژبې ته د قران کریم په ژباړلو پیل وکړ، چې بالاخره په ۱۹۹۱کال یې ټول قران کریم روسي ژبې ته وژباړه.

په منځني ختیځ او روسیه کې د ټولو دیني سازمانونو د اعلان لمخې، والریا یوازینۍ مېرمن وه، چې قران کریم یې په ډېره دقیقه او ښکلې بڼه روسي ژبې ته ژباړلی و او حتا د مصر الازهر پوهنتون هم د نومړې ژباړه ستایلې او تایید کړې وه.

د روسیې د اسلامي سازمانونو اتحادیه لیکي: « آغلې ایمان د قران کریم یوه داسې ژباړه وړاندې کړه، چې ښکلي ادبیات یې درلودل او د قران کریم سجع یې بیانوله.»

همدارنګه د روسیې د آر ټي شبکې د اعلان لمخې، له څو کلونو څېړنو وروسته، د روس د ادبیانو په اعتراف سره د «ایمان» ژباړه د شلمې پېړۍ د ترټولو یوه بلیغ کتاب په توګه وټاکل شوه.

مېرمن ایمان چې تېره دوشنبه وفات شوه، د جنازې مراسم یې نن چهارشنبه(وږی ۱۳) د مسکو په لوی جامع جومات کې ترسره کېږي.

«ایمان» له دې وړاندې د خپل مسلمانېدو په اړه ویلي و: «زه د قران کریم له خاطره مسلمانه شوم، قران مې مطالعه کړ، په هغه کې مې ژور فکر وکړ او ومې لیدل چې زموږ دین یعني یهودي دین او نور ټول الهی دینونه په یوه خاص وخت پورې محدود و.»

ایمان زیاته کړې وه، کله مې چې د اسلام د دین او قرآن کریم په اړه څېړنه او مطالعه وکړه، نو په قلبي ډاډ سره مې اسلام د یوازیني تلپاتي دین په توګه ومانه او مسلمانه شوم.

د یادونې وړ ده، چې ایمان خپلې لوړې زده کړې په مسکو کې د ژبپوهنې او فلسفې په څانګه کې کړې وې او هغه وخت نوموړي خپلې پوهنتوني زده کړې هم په خپل دغه کار کې ډېرې اغېزمنې بللې وې او ویلي و، چې د ژبپوهنې او فلسفې په برخه کې یې زده کړې د دې لامل شوې، چې قران کریم په ژوره توګه درک کړي او په ښه توګه پرې وپوهېږي.

روح الله زهیر