fbpx

د کلدارو ایجنټانو ته د ننګرهار والي څو مهم ټکي

خبریال ډاټ کام: د کلدارو د بندیدو سره د کلدارو د ایجنټانو نفوذ هم ختمیږي. دوی دفرهنګي مافیا په شکل د افغانیو د ترویج پرضد تبلیغ کوي. دی کې شک نشته چې کوم ځای نیم به یو څوک بی انصافي کوي خو عمومي نرخونه کنترول دي او که شواهد وي باید ځان په زحمت کړي، کمیسونونو شمیرو ته، ۱۶۰ شمیري ته او یا مربوطه ناحیه او ولسوالۍ ته خبر ورکړي او هلته باید موجود وي ترڅو د اسنادو په درلودلو سره اجراات وشي. تر اوسه اجراات شوې او کیږي.

همدی ایجنټانو په اوله اونۍ کې چیغي وهلې چې وړې افغانۍ نشته. مونږ پوهیدلو چې په اوله اونۍ کې وړې افغانۍ هرچاته نه رسیږي. دوی د وړو افغانیو د ویش په وخت کې دپوره منفي تبلیغ او احتکار نه کار واخیست خو زمونږ هوډ قوي و او خپلې پروسې ته مو دوام ورکړ. اوس د وړو افغانیو ستونځه په عام شکل حل ده خو مونږ اوس هم کافي وړې افغانۍ لرو او د اړتیا په صورت کې به یې توزیع کوو.

د ترانسپورت د نرخونو په هکله یې کافي منفي تبلیغ وکړ خو څه ګټه یې ونه کړه او اوس نرخونه کنترول شویدي. د ګازو بیه د سالنګ د بندیدو له وجهې لوړه شوه خو د هغې ملا متي یې هم د افغانیو په ترویج اچوله. اوس د ګازو بیه د پخوا نه هم راټیټه شوله ځکه چې د افغانیو ارزښت د ډالر په مقابل کې پورته لاړو.

داجناسو نرخونه پخوا هم ښکته پورته کیدل خو کلدارې چا نه ملامتولې خو اوس د کلدارو ایجنټان او یا هغه کسانو چې د یو چا پورې تړلي دي، د خپل ملي هویت او ملي اقتصاد د ضعیفه کیدو پرضد تبلیغ کوي.

زه دوی ته وایم چې څوک د بل هیواد د ګټو لپاره کار کوي او د خپل هیواد اقتصاد او ملي ارزښت راټیټوي، دا ملي خیانت او جرم دی. د داسې کسانو سره به د قانون په چوکاټ کې جدي برخورد کیږي.

د کلدارو ایجنټان که د هېواد نه بهر یا دننه د هرځای نه هرڅومره منفي تبلیغ وکړي، په مشرقي ولایتونو کې د کلدارو دور ختم دی او څه ګټه نه لري.

د دې پروسۍ د پیل نه دوه ځلې زما د وژل کیدو هڅه وشوه چې یو کس ونیول شو او په دویمه حمله کې زما یو ډریور زخمي شو خو لکه څنګه مې چې ویلې و، د افغانیو د ترویج پروسه موقتي نه ده، ټول ۳۲ کمیسونونه به په ولسوالیو او جلال اباد ښار کې په میاشتو میاشتو کار کوي او سرغړونکو ته به د قانون په چوکاټ کې سزا ورکوي. داسې بیځایه پروپاګند او یا تهدیدونه زمونږ هوډ نشي بدلولې.

افغانۍ زمونږ ملي هویت او استعمال یې د ملي اقتصاد تقویه ده.

لیکنه: د ننګرهار والي ” شاه محمود میاخېل”