د بدن ددفاعي سيستم د حجرو نورمال شمېر

خبريال ویبپاڼه؛ د بدن دفاعي سيستم يا ايمون سيستم موږ د هغه مادو، ميکروبونو، ويروسونو او نورو ناروغيو څخه ژغوري چې زموږ بدن ناروغه کوي او د ناروغۍ د رامنځته کولو توان لري، ډېر وخت زموژ هیڅ پام نه وي او نه پوهیږو چې زموږ بدن ته ميکروب داخل شوی وي خو زموږ د بدن ددفاعي سيستم له لوري له منځه وړل شوی وي، زموږ د بدن ددفاعي سيستم حجرې دا توان لري چې ډول ډول ميکروبونه او نور د ناروغۍ وړتیا لرونکي موجودات وپېژني د يو بل څخه یې بېل کړي او بلاخره له منځه يې يوسي.

د بدن دفاعي سيستم مو د وجود په کومه برخه کې دی؟

د بدن دفاعي حجرې زموږ په ټول بدن کې شتون لري خو اصلي ځایونه او د تولید ځایونه یې بیا بېل دي، د بدن د ايمون يا دفاعي سيستم حجرې د بنسټيزو حجرو له لوري تولیدیږي چې دا بنسټیزې حجرې بيا د هډوکي په مغز کې جوړېږي، ددې ترڅنګ د بدن ددفاعي سيستم حجرې د په ټيموس کې هم جوړېږي، ټيموس د تيرويد يا تايرايډ غدې څخه لاندې موقعیت لري.

د بدن ددفاعي سيستم حجرې په يادو شويو ځايونو کې جوړېږي، وروسته په وينه کې خورېږي، د وينې سپين او سره کرویات د وينې ددفاع سيستم بنسټیز مواد دي، د ټي او بي لېنفوسیتونه د بدن ددفاعي سيستم بنسټیزې حجرې دي چې د وینې په سپينو کروياتو کې ځای لري، دوی لومړی د هډوکي په مغز او ټيموس کې خپل جوړښت پای ته رسوي او وروسته د وینې سيستم ته دننه کېږي او په بدن کې خپرېږي، دا او د بدن ددفاعي سيستم نورې حجرې په بدن کې په پرلپسې ډول تاوېږي او هر هغه څه چې بدن ته رادننه شي او د ناروغۍ وړتياو او قصد ولري سمدلاسه یې له منځه وړي.

د سپينو کروياتو دفاعي حجرې

نوتروفيل او مکروفاژ، ددې حجرو دنده دا ده چې کله هم بدن ته ميکروب او یا بله دې ته ورته ماده رادننه شي نو سمدلاسه دوی تېروي او د خپلو انزايمونو په واسطه یې ټوټې ټوټې کوي له منځه یې وړي.

اېزينوفيل او بازوفيل، دا حجرې د يوې خوا زموږ بدن ته رادننه کېدونکي پرازيتونه له منځه وړي او د بلې خوا څخه د حساسیت له کبله د رامنځته کېدونکو ناروغیو سره مبارزې کوي.

طبعي قاتلې حجرې، دا ډول حجرې د هېڅ شي څخه استفاده نکوي په مستقيم ډول هغه ميکروب او مواد‌ وژني چې پوه شي بهرني دي، کله چې په ميکروبونو باندې د خپلو انزايمونو سره حمله وکړي د هغوی پوښ يا سطحه سورۍ کوي او په دې ډول یې له منځه وړي.

لېنفوسيت، دا زموږ د بدن ددفاعي سيستم مهمې حجرې دي، په لومړي سر کې په دوه برخو وېشل کېږي، ټي او بي لېنفوسيت، د ټي لېنفوسيت بيا نور ډولونه هم لري لکه د ټي اېچ، يا د ټي لېنفوسيت حجرو مرسته کوونکې حجرې دا حجرې د بي لېنفوسيت حجرو لپاره داسې پروټين برابروي چې یو کس د ناروغيو د ګرفتار کېدو څخه ژغوري او دوهم ډول يې ټي اېس حجرې دي چې دا په مستقيم ډول حمله کوي په ځانګړي ډول ويروسونه په مستقيم ډول له منځه وړي.

ددفاعي حجرو نورماله کوچه يا اوسط شمېر

د سپينو کروياتو ددفاعي حجرو اوسط بايد په هر ميکروليتر کې د څلورو څخه تر لسو زور وي، په نویو پيدا شویو ماشومانو کې بايد دا شمېر د ۹ او ۳۰ زرو ترمنځ وي.

نوتروفيل- د ۳۱۵۰ څخه تر ۶۲۰۰، لېنفوسيت د ۱۵۰۰ څخه ۳۰۰۰، مونوسيت د ۳۰۰ څخه تر ۵۰۰، اېزينوفيل د ۲۰ څخه تر ۲۵۰، بازوفيل د ۱۵ څخه تر ۵۰ پورې.