خلک: اندېښمن یو چې د نړۍوالو مرستې بیا حیف و میل نه شي

خبریال وېبپاڼه/ وروسته له هغه چې د افغانستان په اړه د جینوا نړۍوال کنفرانس له دغه هېواد سره د ۱۳ میلیارده ډالرو ژمنه وکړه، افغانان وايي، اندېښمن دي، چې دغه مرستې د تېر په څېر بیا حیف و میل نه شي.

 جینوا دوه ورځني نړۍوال کنفرانس پرون له افغانستان سره د راتلونکو څلورو کلونو لپاره ۱۳ میلیارده ډالره مشروطه مرسته اعلان کړه.

افغانان سربېره پر دې چې د جینوا کنفرانس له لارې له افغانستان سره د مرستو او له دغه هېواد سره د نړۍوالې ټولنې د اوږدمهاله اړیکو په دوام خوښي څرګندوي، بلکې اندېښمن دي چې یادې مرستې د تېر په شان بیا حیف و میل نه شي او باید لومړیتوبونو له مخې په سم ډول ولګول شي.

خلک د نړۍوالو تېرو مرستو او په هېواد کې د روان اداري فساد ته په کتو اندېښنه ښيي او وايي چې مرسته شوې پیسې باید د لومړیتوبونو پر اساس په سترو پروژو ولګول شي، تر څو د اوږد مهال لپاره ګټه ځنې واخیستل شي.

ليکوال او شنونکی اميد دلاور وايي، له افغانستان سره د نړۍوالې ټولنې او بېلابېلو بنسټونو پر ګڼو مرستو سربېره لا هم د دغه هېواد له نيمايي زيات خلک په بېوزلۍ کې ژوند کوي چې په خبره يې لوی لامل يې اداري فساد دی.

دلاور وویل، که د فساد مخه ونه نيول شي، دا مرستې به هم چندان ګټورې نه وي، فقط په شمار د ځينو کسانو له خوا به ورته مختلفې بهانې جوړې شي او خپل کاروبارونه به پرې جوړ کړي.

د جینوا کنفرانس له لارې له افغانستان سره د نړۍوالې ټولنې د ژمنه شویو پیسو د ورکړې په لسو شرطونو کې د اداري فساد مخنیوی هم شامل دی، په داسې حال کې چې افغانستان لا هم د نړۍ په کچه د اداري فساد د لېست په سر کې ځای لري.

د امریکا د بهرنیو چارو وزیر مایک پومپیو د افغانستان په اړه د جینوا نړۍوال کنفرانس ته د وینا پر مهال پر افغان حکومت غږ کړ، چې د قانون حاکمیت، خپلو نړۍوالو مسوولیتونو ته د ژمنتیا او د شفافې حکومتولۍ په برخه کې خپل مسوولیت په سمه توګه ترسره کړي.

هغه ویلي، افغان حکومت باید د فساد په مخنیوي او د اقتصادي اصلاحاتو په برخه کې رښتیني ګامونه واخلي.

د افغانستان د مدني ټولنې مجتمعې (مجما) افغانستان کې د نړۍوالو مرستو د ارزونې په اړه د یوې څېړنې راپور خپور کړ او ویلي یې دي، چې افغانستان سره د نړۍوالو مرستو چندان اغېز نه درلود.

دوی ویلي، د نړیوالو مرستو د اغېزمنتیا په اړه ۵۰ سلنه په دې باور دي چې یادې مرستو لږ تاثېر درلود او په وینا یې، د بشر حقونو په اړه ۸۹.۷ سلنه خلکو د بشري حقونو ضد مجرمینو د مجازات غوښتنه کړې ده.

بل خوا طالبانو له نړۍوالې ټولنې او مرستندویه هیوادونو غوښتي چې له دغې ډلې سره په همغږۍ خپلې مرستې وکړي څو مرستو د حیف و میل کېدو مخه ونیول شي او د څو مشخصو کسانو جیبونو ته لاړې نه شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More