fbpx

په کندز کې مرستندویه موسسو بېرته کار پیل کړی

د کندز چارواکي وايي چې د کندز ښار له تير دوه ځله سقوط وروسته زياتې کورنۍ او بهرنۍ مرستندويه موسسې له دغه ولايت څخه وتلې وې؛ خو د وضعيت په ښه کېدو سره اوس بيرته راستنې شوي دي.
د کندز د والي عبدالجبار نعيمي مطبوعاتي دفتر وويل چې په تيرو اووه مياشتو کې د کندز ولايت مشرتابه هلې ځلې وکړي، څو هغه موسسې چې د بيلابيلو عواملو له امله يې دغه ولايت پرې ايښي ؤ بيرته راستنې شي.
د والي دفتر وايي چې تر اوسه دغو موسسو په دولس زره اړمنو کورنيو بشري مرستي هم ويشلې دي.
ياد دفتر د اوه مياشتني راپور د ورکولو پر مهال ويلي چې پدې موده کې نوي مليونه افغانۍ هم د دولت او موسسو له لورې په اړمنو او جګړه ځپلو کورنيو په نقدي توګه ويشل شوي دي.
د والي دفتر وايي هڅه کيږي څو نورو موسسو ته هم د راتګ زمينه برابره شي.
د يادولو ده چې له ۲۰۱۵م کال راهيسې دوه ځلې کندز ښار د طالبانو په لاس سقوط شو چې مخکې تر هغې له سلو څخه زياتو کورنيو او بهرنيو موسسو دلته فعاليت درلود.
خو اوس که څه هم دولتي چارواکي د دغو موسسو د فعاليتونو د بيا ځلي شروع کيدو خبره کوي خو ويل کيږي چې زياتره موسسې د پخوا په څير فعاليت نه کوي؛ ځکه نه هغه پخواني امکانات ورسره شته او نه هم تر اوسه پوره د فعاليت زمينه ورته برابره شوې ده.
اسلامیک پريس