fbpx

ولسمشرغني: نړیوال اسلامي پوهنتون په ننګرهار کې جوړېږي

افغان ولسمشر محمداشرف غني نن ماښام د ننګرهار ولایت یو شمېر مشرانو، علماو او د بېلابېلو اقشارو استازو سره په کتنه کې وویل، نړیوال اسلامي پوهنتون او د ټکنالوژۍ پارک په ننګرهار کې جوړېږي او د برېښنا د ستونزې حل ته به هم اساسي حل لاره ولټول شي.

له ارګه په خپره شوې خبرپاڼه کې راغلي چې ښاغلي غني د ننګرهار مشرانو او د بېلابېلو اقشارو استازو ته د ښه راغلاست پرمهال وویل، د ننګرهار ولسونه تل د داعش پر وړاندې په مېړانه ودرېدلي او د دوی له برکته زموږ امنیتي او دفاعي ځواکونه د نازیانو په نیولو بریالي شول.

غني په ټینګار سره وویل، نړیوال اسلامي پوهنتون په ننګرهار کې جوړېږي او په دې اړه یې د اسلامي هیوادونو د همکاریو سازمان کې د افغانستان سفیر ته لارښوونه کړې. هغه زیاته کړه، د بهرنیو چارو وزارت هغه مسوولین چې د نړیوال اسلامي پوهنتون د جوړېدو په اړه یې ناسم معلومات ورکړي وو، هغوی به مجازات شي.

ولسمشر وویل، په ننګرهار کې د اداري کمپلکس جوړولو لپاره بودجه ورکړل شوې. په جلال اباد ښار کې د ټکنالوژۍ پارک او ملکي هوایي ډګر د جوړولو لپاره به هم امکانات برابر شي. هغه د برېښنا د نشتوالي له امله د ننګرهار د ولسونو د زغم ستاینه وکړه او د افغانستان د برېښنا شرکت مسوولینو ته یې لارښوونه وکړه، چې د برېښنا ستونزې ته اساسي او دایمي حل لاره ولټوي.

د نړموي په وینا ننګرهار باید د دایمي برېښنا لرونکی وي او د دې لپاره به پانګوال د لمریزې برېښنا د تولید په برخه کې پانګونې ته وهڅول شي.  هغه زیاته کړه، جلال اباد ښار د ختیځ لورته د انکشاف کافي ظرفیت لري.

خبرپاڼه  ليکي په دغه کتنه کې چې د مشرانو جرګې رئیس فضل هادي مسلمیار او  یو شمېر دولتي مقاماتو هم حضور درلود، د ننګرهار والي د یاد ولایت د امنیتي وضعیت په اړه جمهور رئیس ته ډاډ ورکړ او وې ویل، امنیتي او دفاعي ځواکونه په نازیانو کې د دښمن پر ضد چاڼیز عملیات لري. نوموړي په دې برخه کې د ننګرهار د ولسونو د همکارۍ قدرداني وکړه.

سرچینه کاږي د ننګرهار والي په یاد ولایت کې د اصلاحاتو د بهیر چې ولسونه یې پراخ هرکلی کوي یادونه وکړه. هغه زیاته کړه، د ننګرهار د مشرانو او علمای کرامو په منځګړتوب د برېښنا د مزو د پرې کولو ستونز حل شوه.