fbpx

افغان پوهنتونونه نوی تعليمي نصاب او وړ استادان نه لري

د افغانستان ځوانانو ملي ټولنې په کابل کې د زده کړیالانو نړیوالې ورځې د لمانځنې په موخه رابلل شوې غونډه کې د افغانستان د پوهنتونو د تعلیمي نصاب په زوړوالي اندېښنه وښوده، د دوی پر وینا په پوهنتونونو کې تدریس کېدونکی تعلیمي نصاب ډېر زوړ دی، چې د وخت غوښتنې نه شي پوره کولای.

دوی همدا شان په پوهنتنونو کې د استادانو علمي کچه هم ټیټه یاده کړه او پر وینا يې  د حکومت له لوري تعلیمي برخې ته د (۳) سلنه بودیجې ځانګړي کول، هم د حکومت د نه پاملرنې ښکاروندويي کوي.

د غونډې ګډونوال وایي، له نړۍ سره د سیالۍ لپاره په پوهنتونونو کې یو ښه تعلیمي نصاب او وړ استادانو ته اړتیا ده، چې افغانستان په دواړو کې له ستونزو سره مخ دی.

ددې لمانځغونډې ویناوال، له زده کړیالانو غواړي، چې د سیاسي ګوندونو ښکار نه شي، ترڅو له هر ډول فکري، سمتي، ژبني  او قومي تعصب څخه لرې اوسي.

دوی حکومت ته د ملامتیا ګوته نیسي، ګوندې د افغانستان تعلیمي نظام ته ځانګړې پاملرنه نه لري.

دا په داسې حال کې ده، چې هر کال د نومبر پر (۱۷)مه نېټه د نړۍ په ډېرو هېوادونو کې د زدکړیال د نړیوالې ورځې په نوم لمانځل کېږي.