د خبريالانو نيول؛ حکومت پخپله خپله ملا ماتوي

خبريال وېبپاڼه: د خبريالانو نيول؛ حکومت پخپله خپله ملا ماتوي، تېره ورځ د ملت غږ ځایي راډيو چې له کندهاره خپرونې کوي خبر ورکړ چې ددې راډيو څلور خبريالان د ملي امنیت د ځواکونو له لوري نيول شوي دي.

د ملي امنیت له لوري تراوسه په دې اړوند کوم وضاحت نه دی ورکړل شوی خو ددې راډيو د فېسبوک د صفحې له لوري وروسته يو پيغام خپور شو چې پکې ويل شوي و دغه خبريالان د کابل څخه د ملي امنیت په امر د کندهار د ملي امنیت ځواکونو نيولي دي.

وروسته له هغه چې ګڼو رسنیو خبر ورکړ چې ځینې پاکستانۍ ملېشې د ډيورنډ له فرضي کرښې د سپين بولدک دې خواته د افغانستان خاورې ته رادننه شوي دي د ملت غږ راډيو خبر ورکړ چې ددوی يو خبري ټيم ساحې ته ځي او هلته به د طالبانو څخه د پاکستانيو مليشو د راتګ او وروسره په دې سيمه کې د طالبانو له لوري د ځينو خلکو د وژنې پوښتنه وکړي.

د يادې راډيو خبريالان سيمې ته ولاړ او يوه يوه لنډه لايف مرکه یې هم وړاندې کړه، ددغه راډيو خبريال بسم الله وطندوست وويل چې د ژوندۍ خپرونې ترڅنګ به د يادو موضوعاتو په هکله راپور چمتو او وړاندې کړي.

خو د طالبانو تر واک لاندې سيمې څخه د بېرته راتګ په مهال دغه خبريالان د ملي امنیت د ځواکونو له لوري ونيول سول.

موخه څه ده؟

د خبريالانو نیول هغه هم د هغه ادعاوو د سپيناوي په هکله چې د طالبانو تر واک لاندې سيمو کې ترسره شوې وې، څه ډول پيغام لري؟

په عام ذهنیت کې دا کار په واضح ډول د حکومت له لوري د حقايقو د ښکاره کېدو مخنیوی وبلل شو، دا ډول پېښې په عامو خلکو کې د حکومت په وړاندې بې باوري او شک زیاتوي.

کېدی شي ځينې حکومتي چارواکي په دې پوه شي چې دا کار د ملت او دولت ترمنځ فاصله زياتوي خو شته دي داسې چارواکي چې صرف خپل عمر اوږدوي.

مګر ددوي له لوري د‌ عمر اوږدول په حقيقت کې د افغانستان لپاره ډېرې خطرناکې پايلې درلودلی شي، دا ډول چارواکي صرف د خپلې چوکۍ عمر اوږدوي او د هغه فاجعې په هکله فکر نکوي چې ددې هېواد خلک به ورسره مخ کېږي.

که حکومت د يادو خبريالانو په هکله څه شک او اسناد لري چې د نيولو لپاره یې قانوني لار برابروي نو حداقل يوه خبرپاڼه دې خپره کړي که نه دا ډول کړنې په رسنیزه فضا کې د حکومت په وړاندې صرف منفي جبهه تقويت کوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More