طالبان: د بشري مرستو رسولو په چارو کې ښځينه کارکوونکو ته نوی لارښود جوړو
طالبان وايي د بشري مرستو رسولو په ځينو چارو کې ښځينه کارکوونکو ته د يو نوي لارښود په جوړولو کار روان دی.
د طالبانو د حکومت يو شمېر وزيرانو د ملګرو ملتونو لوړ پوړي چارواکي مارټین ګرېفټس سره په ليدنو کې ويلي چې پلان لري د بشري مرستو رسولو په چارو کې ښځينه کارکوونکو ته يو لارښود جوړ کړي او د هغې په اساس د کار کولو اجازه ورکړي.
په بشري چارو کې د ملګرو ملتونو مرستيال مارټین ګرېفټس ويلي که څه هم د دوی او نړيوالو له غوښتنو سره پر افغان ښځو د کاري بنديز صادر شوی فرمان نه دی لغوه شوی خو بيا هم د طالبانو له ځينو وزيرانو سره په ليدنو کې يې مثبت ځوابونه ترلاسه کړي دي.
ښاغلي ګرېفټس زياته کړې چې افغان ښځې د بشري مرستو رسولو په چارو کې مهم رول لري خو اندېښنه دا ده چې پر ښځو د کاري بنديز له امله بېړنۍ ژوند ژغورونکې فعاليتونه ځنډېدلي دي.
په ورته مهال د ملګرو ملتونو د سرمنشي مرستيالې امنې محمد افغانستان ته له سفر وروسته په نيويارک کې خبریالانو ته ويلي چې د طالبانو سره په ليدنو کې یې د افغان نجونو او ښځو د حقونو لپاره د هغوی غږ ورسولو خو د طالبانو يوازنی ټينګار دا دی چې په رسمیت وپېژندل شي او په ملګرو ملتونو کې د خپل حکومت استازی ولري.
امنې محمد ويلي زموږ د معيارونو له مخې رسميت پېژندلو کې بايد ډېر احتياط وشي.
دا په داسې حال کې ده چې د طالبانو د بهرنیو چارو وزیر امير خان متقي هم د ملګرو ملتونو د سرمنشي مرستيالې امنې محمد سره په ليدنه کې ويلي وو چې دوی ځکه پر ښځو بنديزونه لګولي چې نړيوالو د دوی پر حکومت او چارواکو بندیزونه لګولي دي.
شننونکي وايي طالبان له ښځو د سياسي فشار په توګه کار اخلي او د خپلو وروستيو فرمانونو پر اساس غواړي د دوی حکومت په رسميت وپېژندل شي بيا له ښځو بنديزونه لېرې کړي خو د ښځو پر وړاندې د طالبانو دا سخت دريځي د دوی رسميت پېژندل او مشروعيت له نور هم له ځنډ سره مخ کوي.
Comments are closed.