یو هیواد دوه د لوړي‌ مراسم !

خبریال ډاټ کام/له خورا زیاتو هلو ځلو وروسته هم ولسمشر محمد اشرف غني او پخوانی اجرائیه رییس عبدالله عبدالله د ټاکنو د پایلو پر سر د جوړ شوي کړکیچ په حل کولو باندې بریالي نه شول. تېره شپه هم تر ناوخته ولسمشر غني او عبدالله د روانې ناندرۍ پر سر اوږده بحثونه لرل خو ویل کېږي د عبدالله د فرمایشاتو تله درنه وه او غوښتل یې د تېر ولسمشریز څپرکي په څېر د حکومت لویه برخه واخلي او یو ځل بیا دوه سره حکومت را منځته کړي.

ولسمشر غني له پراخ انعطاف ښودلو سره سره د ډاکتر عبدالله د حرص مخه ډب نشوی کړای. هخوا د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم په تېرو ۲۴ ساعتونو کې د ارګ او سپېدار تر منځ کابو پینځه ځله تګ راتګ کړی تر څو د پخواني اجرائیه رییس او ولسمشر غني تر منځ یوه تفاهم ته ورسېږي، خو ویل کېږي چې هغه هم توانېدلی نه دی.

د سرچینو له مخې زلمي خلیلزاد دواړو مشرانو ته د ملي یووالي حکومت وړاندیز کړی چې د ولسمشر غني لخوا رد شوی دی. نن یو خوا ولسمشر غني د خپلې لوړې مراسم نمانځي او ګڼ کورني او بهرني مېلمانه یې را بللي دي. بلخوا عبدالله هم د سمبولیکو مراسمو جوړولو تابیا نیولې ده. دا چې د هېواد او نظام برخلیک به کوم خوا ځي، د ټولنیزو رسنیو فعالانو او سیاسيونو بېلا بېلې طنزیه خپرونې پرې کړې دي. د مطیع الله ابراهیم زي په نوم یو فعال د لوړې مراسمو د شېبه په شېبه د ځنډېدو او دوو ټیمونو د ناندریو په غبرګون لیکي:

((یک قدم پیش، یک قدم پس))

یو بل ټویټر کاروونکی بیا د دواړو ټیمونو تر منځ د روانې معضلې په اړه لیکي:

((افغانستان د نړۍ پر مخ یوازینی هېواد دی چې ۳۴ ولایتونه او ۶۸ والیان لري))

د نثار صالح په نوم یو بل ټولنیز فعال په خپله فېسبوک پاڼه لیکي:

((عبدالله عبدالله دومره هم ساده نه دی چې همزمانه به د لوړې مراسم کوي. که عبدالله دا کار وکړ، پوه شئ چې د سیاسي واسکټ ته یې درز ورکړ. دا سړی پوهېږي چې وطن یو قاضي القضات لري او هغه به د ولسمشر د تحلیف ته ورځي. بل تاسو څه فکر کوي چې کوم هېواد به یې هرکلي او مبارکي وکړي))

روانو بدمرغیو ته په کتو د هېواد را روان ولسمشریز څپرکی هم د تېر هغه په څېر یو مبهم حالت ته روان دی. یو شمېر مطرح سیاسیون په دې اند دي چې ډاکتر عبدالله غواړي د مصالحې عالي شورا په نوم جوړېدونکې جرګه ګۍ مشري واخلي، څو وکولی شي د طالبانو له راتګ وروسته د سیاسي امتیاز له کثرت سره مخ نه شي نو ځکه له همدې اوسه د دولت د چلنج کولو او چاڼو وهلو په درشل کې دی.

دا په داسې حال کې ده چې د دوشنبې په سهار ولسمشر غني د پښتون ژغورنې غورځنګ دوو مخکښو مشرانو علي وزیر او محسن داوړ ته د خپلې لوړې مراسم د دوو ساعتونو لپاره وځنډول، هم مهاله د عبدالله ټیم هم د خپلې لوړې مراسم وځنډول او ویې ویل چې له غرمې وروسته به خپل مراسم ترسره کوي.

ولسمشر غني غواړي د خپل تېر ولسمشریز څپرکي ترخې تجربې او د دوه سري حکومت له خاطرو زده کړه وکړي او د یو واحد دریځي حکومت ګدۍ په لاس کې واخلي خو ډاکتر عبدالله بیا په ښکاره د همه شمول حکومت په زمزمه کولو سره غواړي یو ځل بیا د تېر فصل مزه وڅکي او په واک کې پاتې شي.

مطیع الله همدرد

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy