حکومت د ٤٠٠ طالب بندیانو د ازادولو لړۍ پیل کړه

خبریال وېب پاڼه/ افغان حکومت پرون د ٤٠٠ طالب بندیانو له ډلې ٨٠ تنه طالب بندیان د څرخي پله له زندان ازاد کړل.

ټولو ازادو شویو طالب بندیاندو سوګند کړی، چې بیا به د افغانستان حکومت او د خلکو پر وړاندې وسله نه اخلي او سوله اییز ژوند به کوي.

دا ٤٠٠ طالب بندیان د طالبانو له ورکړي لېست سره سم خلاصیږي او د افغان ولس د مشورتي جرګې له لوري یې د خلاصون خبره هم تایید شوې.

افغان حکومت تر دې وړاندې هم د طالبانو له لېست پرته د هغوی زندانیان ور خوشې کړي، چې د ٤٠٠ طالب بندیانو له ازادولو پرته هم د هغوی شمېر ٥٠١٠٠ او سلو ته رسیږي.

د درنو جرمونو ٤٠٠ طالب بندیانو د خوشې کولو لړۍ به همداسې دوام ولري، د طالب بندیانو ژر خوشې کېدو سره به د سولې بین الافغاني مذاکرات هم ژر پیل شي، په دې ٤٠٠ بندیانو کې لسګونه یې د اعدام پر سزا هم محکوم شوي او زیات شمېر یې د نشه یي توکو په قاچاق کې نیول شوي، خو افغان حکومت یې د سولې لپاره خوشې کوي، څو د طالبانو بهانې هم خلاصې شي او د حکومت سره د مذاکراتو مېز ته کیني.

طالبانو هم د افغان حکومت او مشورتي جرګې له دې اقدام هرکلی کړی وو، چې د دوی درانه مجرمین ور ازادوي او د ژر تر ژره بین الافغاني مذاکراتو پیلولو لپاره یې هم چمتووالی ښودلی وو.

د بین الافغاني مذاکراتو د پیل لپاره د اګسټ ١٦مه نېټه ټاکل شوې، چې حکومت او طالبان به سره پر یو مېز خبرو ته کېني.

د افغان حکومت مذاکراتي پلاوي هم قطر ته د تللو لپاره ټول چمتووالی نیولی او د ویزې او د کرونا د ټېسټونو کارونه یې هم هم بشپړ کړي دي.

په قطر کې د افغانانو خپلمنځي خبرې د پیلیدو په درشل کې دي، خو د دغو خبرو رسنیز پوښښ د محدودولو هڅو د افغان خبریالانو او مدافع بنسټونو اندېښنې را پارولي دي.

ویل کیږي افغان خبریالان، چې د پوښښ لپاره قطر ته د تلو هوډ لري؛ دغه هېواد ویزه نه ورکوي.

عام افغانان هم په دې باور دي، چې باید د افغانانو له خپلمنځي خبرو څخه با خبره وساتل شي او پوه شي، چې د هېواد او خلکو برخلیک ټاکنه کوم پړاوونه وهي او پر کوم لوري روانیږي.

د رسنیو ملاتړي بنسټونه وايي، که څه هم له افغان دولت سره هوکړې ته رسیدلي، چې د خبرو او غونډو جزئیات به رسنیو ته وړاندې کبږي، خو حکومت تر اوسه څه نه وايي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More