د هند د مرستو لومړۍ جوپه هېواد ته را ورسېده

خبریال وېب پاڼه/له هند څخه د ۷۵ زره تنو د مرستو له بکسې لومړۍ جوپه یې را ورسېده.

تېره اونۍ هند افغانستان ته د ۵۰ زره ټنه غنمو مرسته را بار کړې وه چې نن دوشنبه د روانې اپرېل میاشتې په ۲۰ مه نېټه یې لومړۍ جوپه نیمروز ولایت ته را ورسېده.

د ولسمشرۍ ماڼۍ عملیاتي اداره په خپل تازه بیان کې د دغو مرستو د را رسېدو پخلی کوي او وایي چې له هند څخه به د ۷۵ زره ټنو مرستې په را روانې وي. د اوس لپاره له دغو مرستو څخه ۵۰ موټره غنم نیمروز ولایت ته را ورسېدل.

د روانې اپرېل میاشتې په ۱۰ مه نېټه د هند د کرنې او مالدارۍ وزیر په یوه ټویټ کې ویلي چې افغانستان او لبنان ته به د ډیپلوماتیکو اړیکو پر بنسټ غنم واستوي.

دا په داسې حال کې ده د کرونا وبا په خپرېدو سره له نړۍ سربېره افغانستان هم له اقتصادي اړخه په ملیونونه ډالره زیان ولید چې دې حالت په بازار او مارکېټونو باندې هم ژور اغېز وشینده. د اقتصاد وزارت د وروستیو معلوماتو له مخې د خوراکي او لومړنیو ارتزاقي توکو په بیو کې تر اوسه ۲۰ سلنه لوړووالی راغلی چې دې حالت د خلکو ژوند د بېوزلۍ او فقر په لور بېولی دی.

تېره میاشت کې له عربي متحده اماراتو، چین او ازبکستان څخه هم افغانستان ته مرستې راغلې وې دغې هېوادونو له افغانستان سره د کرونا ویروس پر وړاندې مبارزه او نورو بشردوستانه مرستو پر دوام ټینګار کړی ؤ. د ازبکستان له مرستې را رسېدو سره سم په کابل کې د دغه هېواد سفیر ویلي وو چې هېواد به یې له افغانستان سره خپلو بشر دوستانه مرستو ته دوام ورکوي.

کرونا اوس مهال د ټولې نړۍ لپاره په لوی لوی سرخوږي اوښتې ده او ټولې چارې یې درولې دي. تېره اونۍ د روغتیا نړیوال سازمان له نړیوالو وغوښتل چې په خپلو هېوادونو کې دې د کرونا پر وړاندې محدودیتونه نور هم وغځوي.

افغانستان کې هم د کرنتین موده له ټاکلې مودې دری اونۍ نوره هم وغځول شوه.

تېره اونۍ د بهرنیو چارو وزارت هم دغې غنمو د چټک لېږد او د ترانزیټ د آسانتیاوو لپاره لاس په کار شوي ؤ او د هند، ایران او افغانستان سفیرانو ته یې ویلي چې په چابهار بندر کې د دغې مرستو د را واردولو لپاره خپل دین او همکاري ادا کړي.

هند په سیمه کې د افغانستان ستراتیژیک دوست هېواد دی چې له سیاست سربېره په فرهنګي، اقتصادي، وارداتي او ګڼو نورو برخو کې له افغانستان سره ژورې تاریخي اړیکې لري.