د ملي امنیت په چوکاټ کې د اتلانو په نوم زر کسیزه قطعه جوړه شوه

خبریال وېب پاڼه/ په هلمند ولایت کې وروستیو جګړو ډېری هلمندیان شهیدان او ټپیان کړي او بې کوره کړي دي، چې دې ټولو ناخوالو ته په کتو هلمندي ځوانانو دا پریکړه وکړه چې د خپل وطن ساتلو لپاره د خپل ملي امنیتي او دفاعي ځواکونو سره ودریږي.

جوړې شوې قطعې ته به د ملي امنیت په چوکاټ کې نظامي زده کړې هم ورکول کیږي، وروسته به په مهمو نظامي وظایفو کې برخه اخلي.

د هلمند له اراضۍ سره بلد دا ځوانان وايي، موږ ته تر هر څه خپل د هېواد ساتنه او د هېوادوالو عزت خوندي کول لومړيتوب لري.

دوی وايي، ډېر ژر به په سیمو کې د امنیت په ټینګښت کې د خپلو امنیتي سر تېرو سره اوږه پر اوږه برخه واخلي.

د یادې قطعې د پرانیستلو په وخت کې د هلمند والي تورن جنرال محمد یاسین خان راغلو ځوانانو ته د خبرو پر مهال وویل: تاسې رښتیني اتلان یاست چې په خپله خوښه د خاورې ساتنې ته راغلي یاست او غواړئ چې د خپلو ولسونو د ارام او سوکاله ژوند لپاره هڅې وکړئ.

والي زیاته کړه: همدا ځوانان دي چې وطن به له دښمنه ساتي او د هر ډول ورانکارۍ مخه به نیسي او هر هغه څوک چې دلته شومې موخې لري له پښو به يې غورځوي.

والي د هغه کورنیو څخه هم مننه وکړه چې خپل اولادونه يې هڅولې دي تر څو له ملي امنیت، ملي اردو او ملي پولیسو سره یو ځای شي، د خپلو وروڼو تر څنګ د هېواد او خاورې په دفاع کي دندې ترسره کړي.

په ورته وخت کې د هلمند جګړې کابو کولو ته راغلي د هېواد لوی درستیز سترجنرال محمد یاسین ضیا او د کورنیو چارو وزارت ارشد معین ستر جنرال عبدالصبور قانع هم خبرې وکړې او ويې ویل د دې نظامي قطعې جوړېدل به د هلمند پر امنیت او د لا ډېرو پرمختګونو په برخه کې مثبت رول ولوبوي او دغه ډول ځانګړي ځواکونه کولای شي چې په ښه توګه امنیتي پلانونه تطبیق کړي.

د دې تر څنګ هلمند ته راغلی د ملي امنيت لوی رياست ولايتي مرستيال ډګر جنرال نظرعلي واحدي هم خبرې وکړې، راغلي ځوانان يې واقعي د هلمند اتلان یاد کړل.

یادو ځوانانو ته يې وویل: “تاسې به د خاورې ساتنې ته درومئ، تاسې هغه ځوانان یاست چي د خپل ولس د ارام ژوند لپاره به شپه او ورځ زیار باسﺉ او همدا ستاسې په خپله خوښه راتګ د دې څرګندونه کوي چې تاسي په رښتینې توګه اتلان یاست.”

په وروستیو کې د اتلانو په نوم ځانګړي نظامي قطعې ته راغلو ځوانانو وویل: په نظامي چوکاټ کې تر مسلکي زده کړو وروسته به د خاورې خدمت ته ځي او د دې پاکې خاورې هر دښمن ته به غاښ ماتوونکی ځواب ورکړو.

د یادونې وړ ده چې په هلمند کې د وروستیو جګړو څخه لښکرګاه ښار ته ۸۰۰۰ کورنۍ راغلي او په بد وضیعت کې د ژوند شپې او ورځي تر شین اسمان لاندي تېروي.

وحیدالله عمرزاد هلمند

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More