د روزګان دهراوود ولسوالۍ کې سرتیري په وږي نس جګړه کوي

خبریال وېب پاڼه/ د روزګان دهراوود ولسوالۍ سرتیري له شپږو ورځو را په دې خوا خواړه نه لري او په وږي نس جګړه کوي.

دا مهال د دهراوود ولسوالۍ امنیه قومندانۍ، ملي امنیت او ځینو نورو دولتي ادارو کې سرتېري د طالبانو له لوري کلابند دي.

د دهراوود ولسوالۍ د جګړې ٤٠ ورځې تیریږي، امنیه قومندان یې وایي، شپږ ورځې کیږي چې خواړه یې خلاص شوي او د خوړو لپاره هېڅ څه نه لري، سرتېري بې له خوړو په وږي نس جګړه کوي.

د دهراوود اوسېدونکي هم وایي، د جګړې له کبله لارې بندې شوي، دوی ته د ټپیاحو د ویستلو لار هم نه شته او په یاده ولسوالۍ کې د خوړو توکي هم خلاص شوي.

خو د روزګان ولایت مقام وایي، دوه ورځې مخکې دهراوود ته کومانډو او د ملي امنیت ځانګړي ځواکونه او لوړ پوړي امنیتي چارواکي ورغلي چې ژر به د دهراوود ولسوالۍ نیول شوې سیمې ونیسي.

د روزګان دهراوود ولسوالۍ کې د څه باندې یوې میاشت را هیسې سخته جګړه روانه ده، یاده ولسوالۍ تېره ورځ د طالبانو له لوري په شدیده جګړه کې ونیول شوه او اوس مهال د دهراوود دولتي ادارو کې هم سرتیري محاصره دي

د روزګان خلک حکومت تورنوي چې د دهراود ولسوالۍ د جګړې مخنیوي لپاره یې هېڅ اقدامات ونه کړل.

په ورته مهال له نیمې میاشتې را هیسې هلمند ولایت د جګړې په لمبو کې سوځي او ګڼې سیمې یې طالبانو نیولي.

خو د هلمند امنیتي چارواکي وایي، چې ځینې سیمې یې د عملیاتو په ترڅ کې بېرته نیولي او د ولسوالیو او مرکز لښکرګاه ښار تر منځ یې وصل شوې لارې خلاصې کړي دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More