fbpx

د اتمر استعفا؛ د اشرف غني ګټه که تاوان؟

د ملي امنیت شورا سلاکار حنیف اتمر داسې مهال خپله استعفا وړاندې کړه او د ولسمشر له لوري ومنل شوه، چې په افغانستان کې امنیتي وضعیت خراب دی او راتلونکو ټاکنو ته چې جنجالي او د افغانستان سرنوشت سازه مسله بلل کیږي، هم له شپږو اونیو کمې ورځې پاته دي، بل لوري ته د سولې خبرې اترې هم تر بل هر وخت ګرمې او هیله بښونکې شوې دي.

له وسله‌والو طالبانو سره د سولې په اړه د امريکا د ولسمشر نرم دریځ، او د طالبانو له لوري يې هرکلی، اندونیزیا ته د طالبانو د استازي سفر او لیده کاته هغه مسایل دي، چې باید افغان حکومت ورسره په ډير احتیاط چلند وکړي او ژوره ګټه ترې واخلي، خو دا چې په حکومت کې په لویه کچه یو دم د تغیر او تبدیل خبره وشوه او ښاغلي اتمر په دې حساس وخت کې استعفا وړاندې کړله او یا هم استعفا ته اړ شو، په اړه يې بیلا بیل تحلیلونه او نظرونه موجود دي.

لومړی دا چې شمالي ټلوالې له وړاندې په افغان حکومت تور پورې کړی و چې واک يې انحصار کړی او ټولې چارې د یوې خاصې کړۍ په خوښه مخته بیایي او هڅه کوي چې جګړه د افغانستان شمالي ولایتونو ته وغزوي، آن دا ویل کیدل چې حکومت د اتمر په همکارۍ په شمالي ولایتونو کې وسله وال ترهګر په وسلو سمبالوي. څو ځله داسې رپوټونه خپاره شول چې د افغانستان په شمال کې داعش ته وسلې ورکول کیږي او هلته د نامعلومو ادرسونو له لوري الوتکې راځي او وسلې زېرمه‌ کوي.

دويم دا چې په وروستیو کې د افغان ځواکونو د مرګ ژوبلې کچه په بېساري توګه زیاته شوې ده، او لامل یې د مخالفینو پر وړاندې د ښکاره ستراتیژۍ نشتوالی په ګوته شوی، که څه هم څو څو واره په امنیت  شورا کې د افغانستان په بحراني وضعیت غونډې او سلاوې شوې، خو د غزني سقوط د یادو غونډو او مشورو پایله وه، چې په سلګونه کسان پکې ووژل شول او زرګونه نور بې کوره او بې اوره شول.

د غزني له جګړې وروسته، پاکستان کې ځینو سیاسي څېرو دا تایید کړه چې د یادې جګړې څخه ۱۰۶ جنازې پاکستان ته وروړل شوې دي، دا کسان څنګه او کومې خوا غزني ته راغلل او د افغانستان استخبارات په دې نه و توانيدلي چې د راتګ مخه يې ونیسي او یا هم د هغوی په اړه مرکزي حکومت ته پر وخت خبر ورکړي، چې په دې سره هم د ملي امنیت شورا ته د ملامتۍ ګوته نیول کیږي .

د سیاسي کارپوهانو په نظر چې د افغانستان په اوسني ناوړه امنیتي وضعیت کې د اتمر استعفا د هیواد د امنیت او سوکالۍ لپاره ښې پایلې نلري، ځکه چې حکومت ته سوله، جګړه او ټاکنې درې هغه ستر چلنجونه دي، چې کېدای شي په تنظیم کې يې پاته راشي.

باور دا دی چې اتمر د سیمې د هېوادونو پر سیاست بلد دی او په دې برخه کې ښه لوبغاړی بلل کیږي.

خو دا چې د اتمر پر ځای د حمدالله محب ټاکل به څومره وکولی شي چې په څو میاشتو کې لومړۍ د سیمو هېوادونو سره اړیکې ونیسي او بیا د ګاونډیو هېوادونو پر پېچلي سیاست چې لوی قدرتونه پکې ښکېل دي ځان وپوهوي.

خو یو باور داهم دی، چې په دې وروستیو کې ولسمشر په شمال کې خپل زیات شمېر پلویان د ځینو کړنو له کبله له لاسه ورکړل، دوستم یې ترکیې ته فراري کړ، عطامحمد نور یې د بلخ له څوکۍ لرې کړ او همدارنګه یې یو شمېر زورواکان چې د سیاسي ګوندونو ملاتړ یې له ځانه سره درلود ونیول او بندي یې کړل، نو اوس ولسمشر محمد اشرف غني په دې هڅه کې دی تر څو خپل نفوذ په شمال کې زیات کړي، نو د جمعيت ګوند یوه لویه او ارمانجنه غوښتنه یې پوره کړه، او د ځان لپاره یې په شمال کې د اتمر پر سر ټاکنیز کمپاین وکړ .

او بل دا چې د ولسمشریزو ټاکنو موده کمه پاته ده، حنیف اتمر غواړي په راتلونکو ولسمشریزو ټاکنو کې برخه واخلي نو ځکه یې په خپل استعفا لیک کې د ولسمشر سره په ځینو سیاسي مسایلو او ټولټاکنو کې د وروستیو اختلافاتو یادونه کړې، تر څو ولس ته ځان سپین وښایي چې دا په خپله یو ډول کمپاین دی .

بل پلو امریکا  په دې خاطر چې خپل دریځ کې بدلون راولي غواړي خپل ټول سرتېري د افغانستان څخه وباسي او پر ځای یې ټول مسؤولیت یو خصوصي شرکت بلک واټر یا په عامه اصطلاح کرایي قاتلانو ته ورکړي، چې هغه د امریکا لپاره په ټوله معنی ګټور تمامیږي، ځکه څو ورځې مخکې ډونالډ ټرمپ د خپل ټوېټر له ادرسه لیکلي و چې مونږ په افغانستان کې د بریالیتوب پړاو ته نږدې شوي یو نو کیداى شي د محب ټاکنه او د امریکا د ځانګړي استازي په توګه د زلمي خلیلزاد راتګ د امریکا د بریالیتوب سره مرسته وکړي.

Loading...