د سمېع الحق زوی حامد الحق: د افغانستان حکومت کافر دی؛ دې هېواد کې جهاد روا دی

خبریال وېب پاڼه/ د پاکستاني مولانا سمېع الحق زوی حامد الحق په تازه څرګندونو کې ویلي، چې د افغانستان حکومت کافر دی او په افغانستان کې جهاد روا دی.

نوموړي ویلي، افغانستان کې تر هغې جهاد روا دی چې واک طالبانو ته نه وي سپارل شوی، طالبان او د پاکستان حکومت خپلو منځونو کې ستونزه نه لري، طالبان په حقه دي خو افغان حکومت ورسره د دوښمنۍ اور ته لمن وهي.

حامد الحق په خپلو څرګندونو کې د ټرمپ ټاکنیزې ماتې ته هم اشاره کړې او زیاته کړې یې ده، چې ټرمپ د نوموړي د پلار سمېع الحق د وژنې او زرګونو طالبانو د وینو بدل دی، چې ټرمپ له دومره طاقت سره هم بریالی نه شو.

حامد الحق د دې تر څنګ د هند امریکا او افغانستان حکومتونه ظالم بللي او وایي چې هند د افغان حکومت سره مرسته کوي او طالبانو سره جنګیږي.

حامد الحق وایي، پاکستان افغانستان کې د طالبانو اسلامي حکومت غواړي او طالبانو سره به هر ډول مرسته وکړي چې اسللمي حکومت را منځته کړي څو له افغانستان نه پاکستان او د سیمې هېوادونه یې ترهګرۍ وساتل شي.

حامد الحق هم د خپل پلار سمېع الحق په پل روان دی، سمېع الحق هم په افغانستان کې جهاد روا بللی وو خو د نوموړي دا ادعاوې په نړیواله کچه د دیني عالمانو له لوري رد شوې.

په ورته مهال د افغانستان د حج او اوقافو وزارت د حامد الحق د څرګندونو په غبرګون په یو اعلامیه کې ویلي چې حامد الحق د طالبانو د مدرسې چړی د پاکستان حکومت په استازیتوب او لمسون د افغانستان په موضوع خبرې کوي او د دې ماشوم چړي خبرې په کلکه غندوو.

په اعلامیه کې وړاندې راځي چې د حامد الحق له څرګندونو نړیوالو ته هم ثابته شوه، چې پاکستان استخبارات د همدې طالبانو او چړو په واسطه افغانستان کې د جنګ اور ته لمن وهي.

د حج او اوقافو وزارت د پاکستان له اسلامي نظریاتي کونسل نه رسماً غوښتي چې د دې ماشوم د څرګندونو په تړاو خپل دریځ واضح کړي چې د دوی په استازیتوب غږیږي او که نشه یې کړې.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More