پاکستان له غني مننه کړې، چې بندیان یې ورخوشي کوي

خبریال وېبپاڼه/ پاکستان له ولسمشر محمداشرف غني مننه کړې، چې د ښه نیت او بشر دوستانه اړیکو د پیاوړتیا په موخه پاکستاني بندیان خوشي کوي.

د افغانستان لپاره د پاکستان ځانګړي استازي محمد صادق خان پر خپله ټویټر پاڼه لیکلي، هیواد یې د ښه نیت او بشر دوستانه اړیکو پیاوړتیا په هدف د پاکستاني اتباعو ازادلو د حکم په اړه له ولسمشر غني څخه مننه کوي.

هغه په دې برخه کې د پاکستان لپاره د ولسمشر غني له ځانګړي استازي عمر داودزي څخه هم مننه کړې ده.

ولسمشر غني ښه نیت له مخې د یو شمېر پاکستاني بندیانو د خوشي کېدو امر کړی.

دا امر کابل ته د پاکستان د لومړي وزیر عمران خان له سفر او ولسمشر غني سره تر کتنې یوه ورځ وروسته کېږي.

 د زندانونو د تنظیم چارو مسوول فرهاد بایاني ددغه فرمان صادرېدلو سربېره ویلي، ددغو بندیانو د دوسیو په اړه کار پیل شوی او په وینا یې، دا مهال کابل او ځینې ولایتونو کې یوشمېر پاکستانیان بندیان دي.

د فرمان له مخې، دوه ډوله پاکستاني بندیان خوشي کېدونکي دي، یو هغه چې د بند موده یې یوه میاشت پاتې وي او پاتې بد به یې بښل کېږي، بل هغه چې د بند موده یې بشپړه کړې خو د نغدي جریمې نه ورکولو له کبله لا هم زندان کې دي، چې دوی به هم بښل کېږي.

د پاکستاني بندیانو د خوشي کېدو په اړه غبرګونونه

د ملي امنیت پخواني مشر رحمت الله نبیل د ولسمشر ددغه فرمان په اړه اندېښنه ښودلې او وایي چې له مخې به یې سلګونه پاکستاني ترهګر خوشي شي.

 نبیل پر خپله فېسبوکپاڼه لیکلي: (( ډاډه یم چې اسلم فاروقي او سلګونه نور پاکستاني ترهګر به، چې زموږ زرګونه هېوادوال یې شهیدان کړي، ای اېس ای ته به د بډو ورکولو له امله خوشي شي.))

په ټولنیزو رسنیو کې هم ګڼو افغانانو د ولسمشر غني دغه اقدام په کلکو ټکو غندلی او ویلي یې دي، چې غني د واک د غځولو لپاره د افغانانو په وینو سیاست کوي او هغه بندیان خوشي کوي چې لاسونه یې د زرګونه افغانانو په وینو سره دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More