کندهارۍ مېرمنې: که د ښځو پر وړاندې تاوتریخوالی کم نه شي، ژوند مو سختېږي

خبریال وېبپاڼه/ د کندهار د ښځو چارو ریاست وايي، د ۱۳۹۹ کال له پیله تر اوسه یې د ښځو پر وړاندې د تاوتریخوالي ۱۳۸ پېښې ثبت کړې دي، چې زیاتره یې د کورني تاوتریخوالي دي.

د کندهار د ښځو چارو رییسې رقیې اڅکزۍ خبریال وېبپاڼې ته وویل، دوی هڅه کوي چې د عاه پوهاوي له لارې په دې ولایت کې د ښځو پر وړاندې د تاوتریخوالي پېښې راکمې کړي او په وینا یې، په همدې موخه یې د سږ کال په جریان کې ۱۲۰۰ کسانو ته عامه پوهاوی ورکړی دی.

اڅکزۍ زیاتوي، چې د ښځو پر وړاندې د تاوتریخوالي ټولې ثبت شوې قضیې څېړلي یې دي.

 که څه هم د کندهار د ښځو چارو ریاست د ښځو پر وړاندې د تاوتریخوالي پېښو د له منځه وړلو په برخه د لاسته راوړنو خبره کوي، خولا هم د دغه ولایت په لرې پرتو ولسوالیو کې مېرمنې له کورني تاوتریخوالي شکایت کوي او وایي که مسوولې ادارې ورته پام ونه کړي، ژوند به یې نور هم سخت شي.

دوی د ښځو چارو پر ریاست او نورو اړونده ادارو نیوکه کوي، چې هر کال د ښځو پر وړاندې د تاوتریخوالي د پېښو ارقام راټولوي، خو څيړي یې نه.
د دوی په وینا، که د ښځو پر وړاندې د تاوتریخوالي عاملین مجازات شي، اوسنی تاوتریخوالی را کمیدای شي.

ناټو وايي، افغانستان د ښځو لپاره خطرناک ځای دی

کلونو کېږي چې افغان حکومت او نړۍواله ټولنه په افغانستان کې د ښځو پر وړاندې د تاوتریخوالي د کمولو هڅې کوي، خو لا هم په دې هېواد کې هر کال د ښځو د زورزیاتي زرګونه پېښې  ثبتېږي.

یوناما یا په افغانستان کې د ملګرو ملتونو مرستندوی ماموریت په یوه خبرپاڼه کې ویلي، دغه هېواد د ښځو لپاره یو خطرناک ځای دی.

دوی غوښتنه کړې چې د ښځو او نجونو پر وړاندې د جرایمو معافیت باید پای ته ورسیږي او د تاوتریخوالي د پای ته رسولو هڅې باید چټکې شي.

بل خوا د ښځو چارو وزارت ویلي، سږ کال د ښځو په وړاندې د تېر کال پرتله شل فیصده تاوتریخوالی زیات شوی دی.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More