کندهار کې د خرما باغونه؛ ایا د کوکنارو د کښت مخه به ونیسي؟

خبریال وېبپاڼه/ د کندهار د کرهڼې، اوبولګولو او مالدارۍ ریاست وایي، په دې ولایت کې د خرماوو بڼونو دودولو او خرماوو بڼونو جوړولو ته د خلکو هڅونې لپاره په دریوو ولسوالیو کې د خرماوو د ۲۵ جریبه سوداګریزو بڼونو جوړولو لړۍ پیل کړې ده.
د کندهار د کرهڼې رییس سیدحفیظ الله سیدي خبریال وېبپاڼې ته وویل، چې دا پروژه دوه میلیونه افغانۍ لګښت لري، چې په ترڅ کې یې ددې ولایت په دریو ولسوالیو کې د خرماوو ۲۵ جریبه سوداګریز بڼونه جوړیږي او په خبره یې، دا لړۍ ددې ولایت د دامان له ولسوالۍ څخه رسماً پیل شوه.
هغه زیاتوي، دغه بڼونه په دې ولایت کې د خرماوو «کجورو» بڼونو جوړولو د ترویج او پراختیا په موخه جوړیږي.
د نوموړي په وینا، ددې ترڅنګ د کندهار د کرهڼې ریاست هغو بزګرو ته چې، د خرماوو ونو بڼونه لري د خرما ونو د ښې روزنې او پالنې په اړه عامه پوهاوی هم ورکوي.
په یو شمېر ولایتونو کې د کرهڼې وزارت لخوا په ازمایښتي ډول د خرماوو بڼونه جوړې شوي دي.
د چارواکو په خبره، خرما تر ډېره په ګرمو سیمو کې وده کو او هلمند، فراه، کندهار، لغمان او ننګرهار د خرماوو پالنې لپاره مناسب اقلیم لري.
حکومت د کوکنارو د بدیل هڅه کوي
حکومت هڅه کوي چې د خرما، بادامو، پستې او یو شمېر نورو بوټو د باغونو د جوړولو په مرسته د کوکنارو د کښت مخه ونیسي، خو د کندهار په شمول یو شمېر نورو ولایتونو کې لا هم په پراخه کچه کوکنار کرل کیږي، په هلمند کې لا څلور فصله د کوکنارو د کرلو راپورونه ورکول شوي دي.
د کندهار ژړۍ، میوند، پنجوايي، غورک، نېش، میانشین، خاکرېز او شاه ولیکوټ هغه ولس دي چې لا هم بزګران پکې کوکنار کري او د حکومت دا هڅه ناکامه ده چې غواړي خلک د کوکنارو د بدیل کښت کرلو ته وهڅوي.
خلک وایي، د نورو کښتونو په نسبت له کوکنارو زیات عاید لاسته راوړي، ښه خرڅېږي او بازار یې ګرم دی، ځکه یې د دې کښت کرلو ته مخه کړې ده.
دا چې په کندهار ولایت کې د خرما باغونه جوړول به څومره د کوکنارو د کرلو مخه ونیسي، لا معلومه نه ده، ځکه څو څو ځله دا هڅه شوې خو سمه نتیجه یې نه ده ورکړې.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More