تېر ځل میلیوني فساد؛ افغانستان کې کرونا سره د مبارزې لپاره تازه مرسته کېږي

خبریال وېبپاڼه/ مالیې وزارت وايي، د اسیا پراختیایي بانک له کرونا وبا سره د اغېزمنې مبارزې په موخه د افغانستان لپاره سل میلیونه امریکایي ډالر تصویب کړي دي.

 یاد وزارت زیاتوي، دغه پیسې به له کرونا ویروس سره د مبارزې او د هغه منفي اغېزو، د ټولنیز خوندیتوب ښه والي، د افغانستان د روغتیایي سیستم پیاوړي کولو، کار موندنې، ښې حکومتولۍ، له فساد سره د مبارزې، د پراخ اقتصاد د ثبات او یو شمېر نورو مهمو برخو کې ولګول شي.

کرونا سره د مبارزې په برخه کې میلیوني فساد

د اسیا پراختیايي بانک په داسې حال کې افغانستان سره کرونا ویروس لپاره د اغېزمنې مبارزې په خاطر مرسته کوي، چې دې ویروس سره د مبارزې په تېره بودجه کې میلیونونه افغانۍ حیف و میل شوې.

 ولسمشر محمد اشرف غني د کرونا ویروس پر مهال د بودجو د حیف‌ و میل کېدو په اړه د راپورونو له خپرېدو وروسته د پلټنې ادارې ته دنده وسپارله چې د کرونا په برخه کې د ټولو مسؤلو ادارو او چارواکو د لګښتونو پلټڼې وکړي.

د افغانستان د جمهوري ریاست د پلټنې ادارې ویلي وو، چې د کرونا ویروس سره د مبارزې په بودجه کې د پراخ فساد د موجودیت له امله‌ يې د افغان حکومت ۴۴ پخواني او اوسني چارواکي لویې څارنوالۍ ته د پلټنو په هدف معرفي کړي دي.

دې ادارې زیاته کړې وه، چې په پنځو ولایتونو بدخشان، کندهار، نورستان، میدان وردک او هرات کې د دوی د څېړنو موندنې ښيي چې د کرونا په بودجه کې لسګونه میلیونه افغانۍ فساد شوی دی.

د اسیا پراختیايي بانک لخوا د تازه تصویب شوې بودجې په اړه هم اندېښنه موجوده ده چې د کرونا وبا د دوهمې څپې د کنټرول پر ځای به د چارواکیو جیبونو ته لاړې شي، ځکه تېر ځل پراخ فساد په اوسنۍ بودجه کې د درغلي په اړه شک په یقین بدلوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More