د وسلوالو مخالفینو بریدونو خلک اندېښمن کړي

خبریال وېب پاڼه/د هېواد د یوشمېر ولایتونو اوسېدونکي د وسلوالو مخالفینو د وروستیو خونړیو بریدونو له امله سخت اندېښمن شوي دي.

په تېره اونۍ کې د ملګرو ملتونو له خوا په یو خپاره شوي بیان کې ویل شوي وو چې یوازې د روانې مارچ میاشتې په لړ کې شاوخوا شل کسه افغانان وژل شوي دي. په ورته وخت کې ولسي وګړي د طالب اورپکو د وروستیو بریدونو له امله سخت اندېښمن شوي دي.

د هېواد په شمالي زون کې پروت کندوز تېره ورځ هم د طالب وسلوالو د جګوې شاهد ؤ او دې چارې د کورونا ویروس په دې ترهېدلي حالت کې د ولسونو اندېښنې نورې هم زیاتې کړې دي. دا په داسې حال کې ده چې د سولې لپاره د حکومت، امریکا او طالبانو وروستیو هلو ځلو ته ډېری افغانان هیله مند برېښي. د کندوز ښاریان وایي چې له تېرو څو وروځو را هیسې طالبان د ښار ته نیږدې د پل سفید شاوخوا دولتي پوستو باندې بریدونه کوي او په سیمه کې یې د جګړې له امله د عامو خلکو اندېښنې را پارولې دي.

په ورته وخت کې طالب اورپکو د بدخشان په یمګان ولسوالۍ باندې هم غلچکي یرغل ور وړی او ادعا کوي چې دغه ولسوالي یې سقوط کړې ده. پرون ورځ د بدخشان سیمه ییزو چارواکو هم ومنله چې که دغه ولسوالۍ ته بېړنۍ مرسته و نه رسېږي، ښایي یاده شوې ولسوالۍ د طالبانو پر وړاندې سقوط وکړي.

د بدخشان د والي ویاند هم مني چې تېره شپه د دغه ولایت د جرم ولسوالۍ پر یو شمېر پوستو بریدونه وکړه چې له څو ساعته نښتې وروسته د امنیتي ځواکونو څلورو پوستو د طالب اورپکو پر وړاندې سقوط کړی دی. جرم ولسوالي د وسلوالو مخالفینو لپاره یوه مهمه سیمه ده چې ډېری سیمې یې د دوی تر ولکه لاندې دي. تېر کال افغان ځواکونو په خپلو بریدونو کې د دغه ولایت ډېری برخې له دوی څخه نیولې وې.

بل پلو د هېواد په جنوب لویدیځو او یو شمېر مرکزي ولایتونو کې هم طالب اورپکو خپلو بریدونو ته دوام ورکړی دی. دوې اونۍ وړاندې مرکزي حکومت پر طالبانو غږ وکړ چې د کورونا ویروس د مخنیوي په خاطر دې خپل تاوتریخوالی کم کړي څو دولت وکولی شي لرې پرتو سیمو ته چې د وسلوالو مخالفینو تر ولکه لاندې دي، روغتیایي مرستې ورسوي خو طالب اورپکو په دې هکله هېڅ کوم غبرګون و نه ښود او خپلو بریدونو ته یې په ټول هېواد کې دوام ورکړ.

د سیاسي چارو شنونکي وایي چې مرکزي حکومت که څه هم د هېواد امنیت ته د بشپړ چمتووالي ټټر وهي او د کورونا د مخنیوي لپاره یې تمرکز زیات کړی دی، خو طالب اورپکو له همدې فرصته په ګټې اخیستنې هڅه کوي چې د سولې په روانو مذاکراتو کې د اغېزمنتیا لپاره د هېواد پر ډېرو سیمو خپله ولکه زیاته کړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More