چارواکي: له پرون راهیسې په کندهار کې ۲۸ طالبان وژل شوي

خبریال وېبپاڼه/ د کندهار چارواکي وايي، په تېرو ۲۴ ساعتونو کې ملي، امنیتي او دفاعي ځواکونو د ځمکنیو او هوايي عملیاتو پر مهال په دې ولایت کې ۳۶ وسله والو طالبانو ته مرګ ژوبله اوښتې ده.

د کندهار نظامي شورا رسنیو ته په رالېږل شوې خبرپاڼه کې ویلي، دغه عملیات د دې ولایت په ژړۍ او معروف ولسوالیو کې ترسره شوي دي، چې په نتیجه کې یې ۲۸ وسله وال طالبان وژل شوي او ۸ نور مرګوني دي.

خبرپاڼه زیاتوي، په یادو تصفیوي عملیاتو کې د وسله والو طالبانو څو عرادې، موټرسایلکونه، درې بابه پټنځایونه، څلور کړۍ ماینونونه او یو شمطر نور نظامي تجهیزات له منځته تللي دي.

د خبرپاڼې په حواله، په یادو عملیاتو کې ملي، امنیتي او دفاعي ځواکونو ته هیڅ ډول تلفات نه دي اوښتي او د ترهګرو د ځپلو په موخه ګډ تصفیوي عملیات په شدت دوام لري.

د چارواکو په خبره، دغه عملیات د بابا صاحب ګډو نظامي عملیاتو د دوهم پړاو یوه برخه وه، چې د وسله والو مخالفینو د ځپلو په موخه پیل شوي دي.

خو وسله والو طالبان بیا له خپله اړخه په جګړه کې د پرمختګ خبره کوي او وایي، چې د ارغنداب، ژړۍ، پنجوايي او میوند ولسوالیو ډېری برخو کې یې پرمختګ کړی او لسګونه امنیتي سرتېرو ته یې مرګ ژوبله اړولې ده.

په کندهار کې د وروستیو جګړو له امله له بېلابېلو ولسوالیو زرګونه کورنۍ ښار ته ګډه شوې دي، چي د سرپناه ځایونو د نشتون ترڅنګ له سختو اقتصادي ستونزو سره لاس او ګریوان دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More