د پاکستان په راولپېنډۍ کې چاودنې تر اوسه ۲۵ کسان ژوبل کړي

خبریال وېبپاڼه/ نن ماسپښین د پاکستان د پنجاب ایالت په راولپېنډۍ ښار کې د پوليسو يوه مرکز ته نږدې چاودنه شوې، چې له امله یې تر اوسه د ۲۵ کسانو د ټپي کېدو خبر ورکړل شوی دی.

ښايي دغه شمېره تر دې هم زیاته شي او د دې تر څنګ په ټپيانو کې د ځينو روغتيايي وضعیت د اندېښنې وړ ښودل شوی دی.

پوليس وايي، لومړی د ګنج منډه‌يي د پوليسو مرکز ته څېرمه د لاسي بم بريد شوی دی او وروسته چې پوليس د پېښې ځای ته ورځي، دويمه چاودنه کېږي.

دوی زیاتوي، په دواړو چاودنو کې پنځه ويشت تنه ژوبل شوي چې د راولپېنډۍ ملکي روغتون ته لېږدول شوي دي.

د دغه روغتون مسوولين وايي، په ټپيانو کې د ځينو حالت ډېر نازک دی او دوی اندېښنه لري چې ښايي د پېښې د قربانيانو شمېر به نور هم زيات شي.

تر اوسه د چاودنې مسووليت چا په غاړنه نه دی اخیستی.

څو ورځې وړاندې هم په راولپېنډۍ کې ورته چاودنه شوې چې له امله يې يو شمېر کسان مړه او ژوبل شوي وو.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More