کرزی طالبانو ته: د پردیو له ولکې راووځي، د وطن ابادۍ ته کار وکړئ

خبریال وېبپاڼه/ پخوانی ولسمشر حامد کرزي پر طالبانو غږ کړی چې د پردیو له ولکې ځان وباسي او د جګړې پر ځای د وطن د ابادۍ لپاره مټې ونغاړي.

هغه په خپله وروستۍ مرکه کې له طالبانو غوښتي چې سولې او اوربند ته غاږه کېږدي او له نورو افغانانو او اړخونو سره یو ځای د جګړې پر ځای د وطن د ابادۍ لپاره لاس په کار شي.

حامد کرزي د سولې په برخه کې د امریکا د هڅو قدرداني کړې او ویلي یې دي چې د سولې اوږده او جنجالي پروسه په رښتیني او منطقي ډول مخته یوړل شي، تر څو نور د لسیزو جګړې ختمې شي.

هغه په هېواد کې روانه جګړه د اندېښنې وړ بللې او ویلي یې دي چې په دې ډول حساسو شرایطو کې باید بهرني ځواکونه په مسوولانه او قانونه توګه له افغانستانه ووځي، تر څو دغه خاوره بیا د ترهګرو په ځاله بدله نه شي.

پخوانی ولسمشر په داسې حال کې له طالبانو غواړي چې وسله دې پر ځمکه کېږدي او د وطن ابادۍ ته دې کار وکړي، چې په قطر کې د طالبانو د سیاسي دفتر مشر ملابرادر پاکستان ته تللی او هلته له ټپي طالبانو سره د کتنې پر مهال هغوی ته د خپلو قربانیو د اخروي بدیل ډاډ ورکوي.

دا په دې معنا ده چې طالبان په هیڅ صورت له جګړې لاس نه اخلي او تازه به له پاکستانه د جګړې د دوام او د سولې پروسې د پیکه کولو په اړه نوی پیغام راوړي.

که څه هم کرزي نه ده په ډاګه کړې چې طالبان د کومو پردیو هېوادونو له ولکې ځان راوباسي، خو تر بل هر چا زیات پر وسله والو طالبانو د پاکستان اغېز پروت دی، هغه پاکستان چې له امله یې پر افغان خاوره تر بل هر وخت زیات اور بل دی او د مړه کولو لپاره یې په هیڅ صورت رښتینې همکاري نه کوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More