ازبکستان له افغانستان سره امنیتي همکاري زیاتوي

خبریال وېبپاڼه/ ازبکستان له افغانستان سره د دوه اړخیزه امنیتي همکاریو او اړیکو د پراختیا ډاډ ورکړی.

په همدې موخه د بهرنیو چارو وزیر حنیف اتمر د ازبکستان د دولتي امنیتي خدماتو د رییس له مرستیال فرخ مختاروف سره کتلي دي.

د بهرنیو چارو وزارت په یوه خبرپاڼه کې ویلي، چې د ازبکستان دغه لوړپوړي امنیتي مسوول ویلي افغانستان ته یې د راتګ موخه دا ده چې د دواړو هېوادونو ترمنځ اړیکې پراخې او امنیتي همکارۍ ډېرې شي.

د ده په وینا د افغانستان او ازبکستان ترمنځ د امنیتي همکاریو پراختیا د دې سبب کېږي چې په سیمه کې امنیت تامین شي او د احتمالي ترهګریزو فعالیتونو مخنیوی وشي.

هغه ویلي چې ازبکستان د افغانستان د سولې له پروسې هم ملاتړ کوي او په دې برخه کې هر ډول همکاریو ته تیار دی.

 تر دې وړاندې هم افغان حکومت ویلي وو چې د ازبکستان او افغانستان ترمنځ به د امنیتي همکاریو توافقات رامنځته کېږي او هڅه کېږي چې ددواړو هېوادونو ترمنځ اړیکې پراخې او پیاوړې شي.

ازبکستان داسې مهال له افغانستان سره د امنیتي همکاریو ډاډ ورکوي چې ټاکل شوې ده تر راتلونکو دریو ورځو پورې په افغانستان کې د امریکايي ځواکونو شمېر ۲۵۰۰ ته راکښته شي.

که څه هم له افغانستانه د امریکايي ځواکونو وتلو په کور دننه اندېښنې پيدا کړې دي، خو د ازبکستان په شمول یو شمېر هېوادونو امنیتي برخو کې افغانستان ته د همکارۍ ډاډ ورکړی دی.

روسیې خو تر دې پورې ویلي چې چمتو دي خپل سرتېري افغانستان ته ولېږي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More