ډنډ پټان کې قومي شخړو ۷ کسانو ته مرګ ژوبله اړولې

خبریال وېب پاڼه/د پکتیا په ډنډ پټان ولسوالۍ کې د منګلو او خروټو تر منځ د ځمکې بر سر شخړې ۷ کسانو ته مرګ ژوبله اړولې ده.

د ډنډ پتان ولسوال عید محمد احمدزی وایي چې د دغو دوو قومونو تر منځ د داري درنګ غره او ببري ډنډو ځمکې پر سر له شاوخوا ۳۰ کلونو را هیسې دعوه ده. د دغې قومونو تر منځ جګړه کې پر یوه کور د هاوان مرمۍ لګېدلې، دوه ماشومان او یوه ښځه یې وژلي دي او د دوو ښځو په ګډون څلور کسان ټپیان دي.

پرون چهارشنبې په پکتیکا کې هم ورته پېښه شوې وه چې له جګړې وړاندې سیمې ته امنیتي ځواکونه رسېدلي وو او د خونړۍ پېښې مخه یې ډب کړې وه.

دا په داسې حال کې ده چې تر هغې هم یوه ورځ وړاندې په ننګرهار ولایت کې د دوو قومونو تر منځ جګړه را منځته شوې وه. دا پېښه د دور بابا او نازیانو ولسوالۍ کې را منځته شوې وه. د دور بابا ولسوالۍ څخه په دغه پېښه کې یو کس وژل شوی او لس نور ټپیان وو او بل پلو د نازیانو ولسوالۍ څخه بیا ۵ وژل شوي او ۱۶ نور یې ټپیان شوي هم دي.

د ننګرهار د والي ویاند خوګیاڼی هم د پېښې پخلی کړی ؤ او ویلي یې وو چې د یو شمېر ټپیانو روغتیایي حالت هم د اندېښنې وړ دی.

عام ولس د خلکو تر منځ یادو شویو پېښو اندېښمن کړی دی او وایي چې دا ډول پېښې له نورو جنګي پېښو سره یو ځای د هېواد لپاره ستر سرخوږی دی.

د هېواد سوېل ختیځ زون کې ډېری وخت د قومونو تر منځ دغه ډول خپل منځي ستونزې را ولاړېږي چې ډېری وخت په تاوتریخوالي هم اوړي. کال مخکې په خوست کې د دوو قومونو تر منځ جګړه را منځته شوې وه چې په هغې کې هم تلفات را منځته شوي وو.

د راپورونو له مخې تېره ورځ په پکتیکا په پېښه کې هم یوه قوم غوښتل په زرو د پر دعوه ګیره ځمکه کې آبادۍ وکړي چې د بل قوم له سخت غبرګون سره مخ شوي وو.

د پکتیا د ډنډ پټان کې د یادو شویو تلفاتو په اړه ویل کېږي چې تېر ماښام د منګلو د قوم لخوا د هاوان مرمۍ توغول شوې وه چې د خروټو پر یوه کور لګېدلې وه او د دریو کسانو ژوند یې واخیست او څلور نور یې ټپیان کړل. د پکتیا ولایت د والي ویاند هم پېښه تائیدوي خو په وینا یې د څرنګوالي لپاره یې څېړنې پیل کړې دي.

دا په تېرو دریو ورځو کې د قومونو تر منځ پرلپسې دری پېښې دي چې په لومړنۍ او وروستۍ هغې کې یې ځاني تلفات هم لرل.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More