دریو ولایتونو ته ۱۵ ټنه روغتیایي توکي واستول شول

خبریال وېب پاڼه/د عامې روغتیا وزیر فېروزالدین فېروز په خپله فېسبوک پاڼه دریو ولایتونو ته د ۱۵ ټنه درملېزو توکو د استولو خبر ورکوي.

نوموړی وایي چې په دغو ۱۵ ټنه روغتیایي بېلا بېل روغتیایي مواد موجود دي چې اووه ټنه یې بلخ، ۵ ټنه ننګرهار او دری ټنه نور یې سمنګان ولایت ته واستول شول.

دا په داسې حال کې ده چې ننګرهار کې تازه د کرونا د مثبتو پېښو د زیاتېدو شونتیا لیدل کېږي. تر دې وړاندې په دغه ولایت کې دوو کسانو د کرونا ویروس له امله خپل ژوند له لاسه ورکړی ؤ. دوه ورڅخه بېرته ذغېدلي هم وو خو د دغه ولایت چارواکي په یاد شوي ګڼ نفوذه ولایت کې د خپلو احتیاطي تدابیرو د زیاتولو لپاره خپلې هڅې جاري ساتي.

په بلخ کې هم د کرونا له امله دری کسان مړه شوي او ۱۱ کسان پرې اخته شوي وو. سمنګانو کې هم ۸ مثبتې پېښې ثبت شوې دي.

په ورته وخت کې د عامې روغتیا وزارت د مخابراتو او معلوماتي ټکنالوژۍ وزارت په مرسته د کرونا ویروس په هکله معلوماتي اپلیکېشن هم فعال کړ. په دغه اپلیکیش کې به د کرونا په هکله ټول کره معلومات، لارښوونې او سپارښتنې وړاندې کېږي. د روغتا وزیر د معلوماتو او ټکنالوژۍ له وزارت له همکارۍ مننه وکړه.په یاد اپلیکیشن کې د کرونا آنلاین معاینات هم کېږي. ښاغلي فېروز پر هېوادوالو غږ وکړ چې خپل ځانونه په آنلاین توګه په کې معاینه کړي.

نوموړي همداراز وویل چې د کابل د دارلمان قصر په ګډون یې د په ښار کې ۲۲ د تشخیص مرکزونه فعال کړي دي چې په دې کې د کابل پولیتخنیک او او پوهنتون لیلیې هم شاملې دي. دا ځایونه د هغو کسانو لپاره په پام کې نیول شوې چې روغتیایي حالت یې د زیاتې اندېښنې وړ نه وي.

ښاغلي فیروزالدین فېرزو په هېواد کې د محافظتي کېتونو، N_95 ماسکونو او میکروب ضد ایتانولونو د تولید د یوې فابریکې د جوړولو خبر هم ورکړ او زیاته یې کړه چې په نړۍ کې د کرونا له امله دغې وسایلو بیې په کم سارې توګه لوړې شوې دي نو په وینا یې دوی هڅه کوي چې په خپل هېواد کې د پورتنیو موادو د جوړولو فابریکه ولري.

دا په داسې حال کې ده چې تر دې دمه په ټول هېواد کې د کرونا ۴۸۴ مثبتې پېښې ثبت شوې دي چې له ډلې یې ۱۵ کسان مړه شوي او تر ۳۰ زیات کسان بېرته رغېدلي هم دي. په ټوله نړۍ کې بیا د کرونا مثبتې پېښې تر ۱۵ لکو اوښتې دي او د قربانیانو د جدول په سر کې لا هم ایټالیا ده چې تر ۱۷ زرو زیات کسان یې د دغې ناروغۍ له امله وژل شوي دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More