هند؛ ناوې د واده مراسمو کې له ډېرې ژړا مړه شوه

خبریال وېبپاڼه/ په هند کې یوه ناوې د واده په مراسمو کې د ډېرې ژړا له امله مړه شوې ده.

د هندي رسنیو د راپورونو له مخې، دغه پېښه د هند د اودیشا ایالت په سونپور سیمه کې رامنځته شوې ده او د واده مراسم د ناوې د مرګ له امله په غم بدل شول.

د ناوې کورنۍ وايي چې د دې نجلۍ پلار څو میاشتې وړاندې مړ شوی و او تر هغه وروسته یې لور یعنې ناوې چې پلار ورته بې حده ډېر ګران وو تر سخت ذهني فشار لاندې وه.

ناوې چې د واده په مراسمو کې د پلار نشتون احساس کړی، ژړا یې زیاته شوې او هماغسې پسې مړه شوې ده.

پولیسو د ناوې جسد د څېړنو په موخه عدلي طلب ته استولی، تر څو د مړینې علت یې لا ښه روښانه شي، چې ایا رښتیا ذهني فشار و او که کومه بله مسله وه، چې دوی پرې نه دي خبر.

په هند کې ودونه په بېلابېلو ډولونو ترسره کېږي، خو د مسلمانانو او هندوانو رواجونه یو له بله توپیر لري. د هند مسلمانان د واده مراسم تقریباً پښتنو ته ورته ترسره کوي. دا تازه پېښه هم چې شوې ویل کېږي چې دغه کورنۍ مسلمانه وه.

د هندوانانو عجیبه رواجونه

هند هغه هېواد دی چې د نړۍ په کچه پکې رواجونه پکې زیات دي، ودونه یې هم په بېلابېلو ډولونو ترسره کېږي.

د واده یو رواج یې دا دی چې هلک په خپله خوښه نجلۍ نه شي کولای، بلکې پرې تحمیلېږي او د مخالفت حق نه لري، ځکه دوی ګمان کوي چې که هلک له ټاکل شوې نجلۍ سره واده ونه کړي، نو خدایان یې خپه کېږي.

د هند په ځینو سیمو کې بیا یوه ښځه له څو کسانو سره واده کوي او هر یوه ته شپه جلا کوي، کله یوه او کله له بل سره وي، د اولادونو د تقسیم طریقه یې هم عجیبه ده، لومړی اولاد یې د تر ټولو غټ خاوند وي، دویم یې بیا له هغه نه په ټیټ عمر او درېیم هغه یې له هغه نه په ټیټ عمر ورکول کېږي.

د هند بل نادر رواج دا دی چې ځینو سیمو کې مهر په مېرمنې لازم وي او خاوند ته به یې ورکوي.