نواز شریف وايي، د پاکستان بقا له جدي خطر سره مخ ده

خبریال وېبپاڼه/ د پاکستان پخوانی وزیر اعظم او د مسلم لیګ ن ګوند مشر نواز شریف وايي، چې د دغه هېواد اوسني حکومت د خپل ناکام سیاست او نیمګړې اقتصادي تګلارې له امله د پاکستان بقا له جدي خطر سره مخ کړې ده.

 نوموړی خپلې لور ته ور پېښ شوي ګواښ سخت غوسه کړی او دا خبره یې هم د دغه ګواښ په غبرګون کې پر خپله ټوېټر پاڼه کړې ده.

 تېره ورځ په کراچۍ کې د شپې په مهال د مريم نواز د هوټل دروازه نامعلومه کسانو ماته کړې وه او هغې ته یې ګواښ کړی و، چې که له خپلې مبارزې لاس وانه خلي؛ نو ژوندۍ به پاتې نه شي.

 نواز شریف د دغه ګواښ په غبرګون کې ویلي، چې که مریم نواز ته څه ورپېښ شول؛ نو مسوولین به یې عمران خان، د پوځ مشر جنرال جاوید قمر باجوه او د ای ایس ای مشر وي، ځکه په خبره یې، اوسنی حکومت د بیان د ازادۍ مخه نیسي.

نوازشریف ویلي:(( د پاکستان جمهوري نظام او اخلاقيات د پښو لاندې کړی شوي دي په کراچۍ کې د شپې په مهال د مريم نواز د هوټل د کمرې دروازه ماته کړل شوې او اوس ورته ګواښ کيږي چې که هغه مبارزه پرېنږدي، نو وبه وژل شي.))

هغه دغه راز ویلي چې د پاکستان اوسني حکومت او په ځانګړي ډول عمران خان د یاد هېواد بقا له زیان سره مخ کړې او اوسنۍ چارې د یو نا اهله انسان په واک کې دي.

د نوموړي په خبره، د اوسني حکومت د ناکام سیاست او نیمګړې اقتصادي تګلارې له امله پاکستان په کړنګ ولاړ دی او ښايي ډېر ژر په بېلابېلو برخو کې د پولۍ ټک ته کېنول شي.

نواز شریف همدا راز، عمران خان ته په اشارې ویلي، چې د چارو مدیریت کول د هر چا د وس کار نه دی او نه هم د واک چلول اسانه دي، ځکه خو پاکستان نن ورځ په دې بد وضعیت کې قرار لري.

عمران خان او د پاکستان پوځ تر اوسه د نواز شریف د دغو څرګندونو په اړه څه نه دي ویلي.

پاکستان که څه هم دیموکراټ هېواد دی او حکومت یې د دیموکراسۍ د پلي کولو عوې کوي، خو هلته اوس هم د بیان له ازادي نیولې بیا تر نورو فعالیتونو له خطر سره مخ دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More