خلیلزاد او کالییوف په افغان سوله او صادراتو غږېدلي

خبریال وېب پاڼه/د افغان سولې لپاره د امریکا د بهرنیو چارو وزات ځانګړي استازي د قزاقستان له ځانګړي استازي سره د افغانه سولې په هکله خبرې کړې دي.

زلمي خلیلزاد په خپل تازه ټویټ کې ویلي دي چې د قزاقستان له ځانګړي استازي کالییوف سره یې لیدلي دي او افغانستان ته یې د دغه هېواد د غله جاتو او غنمو د صادراتو د اهمیت او بیا پیلولو په هکله خبرې کړې دي. نوموړی په خپل ټویټ کې لیکي چې:

((د قزاقستان له ځانګړي استازي کالییوف سره مې دا اونۍ افغانستان ته د غلجاتو او غنمو د صادراتو د اهمیت او بیا پیلولو په ګډون په ګڼو مسایلو خبرې وکړې))

دا په داسې حال کې ده چې خلیلزاد له تېرو دوو ورځو را هیسې د افغان سولې لپاره بیا خپل سفرونه پیل کړي دي. په قطر کې د وسلوالو طالبانو له مرستیال مشر ملا برادر سره تر کتنې وروسته نوموړی د افغانستان لپاره د ناټو د قومندان سکاټ مېلر په ملتیا پاکستان ته ولاړ او هلته یې د دغه هېواد د پوځ له مشر جنرال قمر باجوه سره د افغان سولې په هکله خبرې وکړې.

خلیلزاد له تېرې کابو یوې میاشتې را په دېخوا د سولې لپاره خپل فعالیتونه درولي وو، که څه هم په ظاهره یې څه نه وو ویلي خو د کویډاـ۱۹ وبا په خپرېدو سره په ټوله نړۍ کې ډېری فعالیتونه په ټپه درېدلي دي.

نوموړی له قزاقستان سره د غنمو او غلجاتو خبره وروسته له هغه کوي چې په افغانستان کې د کرونا له امله د لومړنیو خوراکي توکو بیې په کم سارې توګه لوړې شوې دي او تېره اونۍ د اقتصاد وزارت په یوه خبرپاڼه کې راغلي وو چې په ټولو خوراکي او ارتزاقي توکو کې ۲۰ سلنه لوړ والی راغلی دی.

قزاقستان په آسیا کې د غنمو یو ستر تولیدوونکی هېواد دی چې د اوړه کولو او پروسېس ډېری فابریکې یې په ازبکستان کې دي. افغانستان هم له دغه هېواد څخه د غنمو او اوړو په ګډون ډېری خوراکي توکي را واردوي. دوې اونۍ وړاندې له ازبکستان څخه هم د خوراکي او روغتیایي توکو یوه بکسه را ورسېده، چې په کابل کې د دغه هېواد سفیر په خپلو څرګندونو کې وویل چې نوموړې بکسه د ازبکستان د ولسمشر لخوا د افغانستان خلکو ته ډالۍ ده.

ښاغلي خلیلزاد هم د قزاقستان له ځانګړي استازي کالییوف سره په همدې تړاو خبرې کړې دي او وایي چې له هغه سره یې توافق کړی چې په سیمه ییز اتصال او همغږي نه یوازې د یوې دوامدارې سولې لپاره آساسي دي بلکې زموږ د ګډې راتلونکې په وړاندې نړیوال ګواښونه هم ځوابوي، هماغسې چې د کرونا وبا پر وړاندې روانه مبارزه ښیي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More