برېښنا شرکت: ښایي ٨٠ سلنه وارداتي برېښنا بنده شي

خبریال وېب پاڼه/ یو شمیر دولتي بنسټونه ۷.۹ ملیارده افغانۍ پوروړي دي، برېښنا شرکت وايي د دې تشې ډک کولو لپاره دولت باید ۵۰ میلیونه ډالر پور راکړي.

ښایي اتیا سلنه وارداتي برېښنا بنده شي، د افغانستان د برېښنا شرکت وایي دولتي بنسټونه یې څه باندې ۷ میلیارد افغانۍ پوروړي دي او پنځوس میلیون ډالره یې له دولت څخه د پور غوښتنه کړې ده.

که حکومت د برېښنا شرکت مالي ستونزه جدي حل نه کړي ښایي هېواد ته راغلې اتیا سلنه وارداتي برېښنا بنده شي.

د برېښنا په شرکت کې مسؤولین وایي، د برېښنا د لګښت له وجې په حکومتي بنسټونو ۷.۹ میلیارده افغانۍ پور دی چې له دې ډلې ۳.۲ میلیارده افغانۍ یوازې د دفاع په وزارت پورې اړوندیږي.

د برېښنا شرکت وایي خپلې مالې ستونزې یې له حکومت سره شریکې کړي، دوی وايي که چېرې دې موضوع ته رسېدنه ونه شي، ښایي اتیا سلنه وارداتي برېښنا بنده شي.

د مالیې وزارت هم مني چې حکومتي بنسټونه د برېښنا شرکت پوروړي دي او دا وزارت د مالي کال په پای کې د اړونده وزارتونو له بودیجې څخه دا لګښتونه د برېښنا شرکت په حساب جمع کوي.

د مالیې وزارت ویاند شمروزخان مسجدي وایي، د دفاع او کورنیو چارو وزارتونو د پور ستونزه یې له سیتکا ادارې سره شریکه کړې ده.

اقتصادي کارپوهان وایي د مالیې وزارت باید د برېښنا دا ستونزه حل کړي که نه نو د برېښنا د بندژدو لامل به د مالیې وزارت وبلل شي.

له دې مخکې هم د برېښنا شرکت د سلګونو پوروړو نومونه افشا او د دوی د برېښنا د پرې کولو لړۍ یې پیل کړه.

په دغو پوروړو کې لوړ پوړي چارواکي، پخواني قومندانان، وزارتونونه او یو شمېر نور پیژندل شوي کسان شامل دي.

د برېښنا شرکت داسې مهال په خپلو پوروړو د پیسو د ورکړې فشارونه ډېروي چې ویل کیږي ډېر دا کسان زورواکي دي او حکومت هم نه شي کولاي په کمزوري موقف ورڅخه څه حاصل کړي.

افغان حکومت په دې وروستیو کې د اقتصادي وضعیت د ښه کېدو او په خپل اقتصاد د بسیا کیدو لپاره په بېلابېلو لارو ټينګار کړی تر څو له خلکو په وخت مالیات جمع کړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More