fbpx

داسې قلم چې هر رنګ کاپي کولاى شي

په امريکا کې انجنئيرانو داسې يو په زړه پورې قلم جوړ کړى دى، چې د هر شي رنګ کاپي کوي او بيا په هماغه رنګ کې بېرته خط ليکي. يعنې په هر څه شي چې يې لږ ساعت کېږدئ، بيا به وکولاى شئ چې په هماغه رنګ کې پرې ليکل وکړئ.

د دې قلم نوم (سکريبل ځيرک قلم) [سکريبل سمارټ پين] دى او تاسې چې د هر رنګ په اړه فکر کوئ، په هماغه رنګ درته ليکل کوي. د دې قلم بيه ١٥٠ امريکايي ډالر ده او داسې ټېکنالوژۍ نه پکې ګټه پورته شوې ده، چې هر رنګ په ثانيو کې پېژني او هماغه رنګ خپلوي.

په دې قلم دومره خواري شوې ده، چې آن د ګلاب، مڼې او آلوبالو په سرو رنګونو کې هم توپير کولاى شي او همدغه ډول رنګ درته بېرته په ثانيو کې برابروي. که چېرته په کور کې بوټي ولرئ، نو کولاى شئ چې هماغه رنګ هم پرې کاپي کړئ.

کله چې تاسې يو رنګ غوره کړئ، نو ځيرک مايکرو پمپ په ډېره پرمختللې ټېکنالوژۍ او جديد انک کارټريج سره رنګونه يو ځاى کوي او ستاسو غوره شوى رنګ درته جوړوي او په دې کې بس د يو څو ثانيو وخت لګي. د دې قلم جوړونکي دعوه کوي چې د دې قلم خط واټر پروف دى او نه خرابېږي. خو دا نه معلومېږي چې يو ځل باندې دا قلم څومره خط ليکلى شي، خو د شرکت مسوولين وايي چې د څو ميله کرښې راښکلو لپاره ډېر دى.

د سکريبل قلم دوه ورژنه دي، په يو کې قلم په خپله ټول رنګونه جوړوي او تاسې ترې بېرته ګټه پورته کولاى شئ او په بل کې بيا ستاسې رنګ ځيرک موبايل يا هم ټېبلېټ کې راښکاره کوي چې تاسې کولاى شئ هغه ډول کالي يا د کور لپاره سامان له انټرنېټ څخه واخلئ. همدا راز په دې کې د بلوټوت اسانتيا هم شته. چې دا قلم يو ځل چارج کړئ، نو بيا تر ٧ ساعتونو پورې کار کوي او کولاى شئ چې د يو اېس بي په کېبل يې چارج کړئ.