د اشغالګرو د خطاب وروسته اردوغان د طالبانو په هکله دريځ بدل کړ

خبريال وېبپاڼه: د کابل د هوايي ډګر د ساتنې او ورسره په افغانستان کې د ترکي ځواکونو د پاتې کېدو مسلې د طالبانو او ترکيې ترمنځ اړیکې خرابې کړې دي.

تېره ورځ د ترکیې ولسمشر رجب طیب اردوغان رسنيو ته د خبرو په مهال وويل چې طالبان بايد په افغانستان کې د خپلو وروڼو د خاورې اشغال ته د پای ټکی کېږدي.

د اردوغان دغه څرګندونو ته تراوسه پورې طالبانو کوم غبرګون نه دی ښودلی، خو تازه اردوغان په قبرس کې رسنيو ته د خبرو په مهال د خپلو پرونیو څرګندونو په نسبت نرمې او حتی ویلی شو مثبتې څرګندونې وکړې.

اردوغان نن رسنیو په خبرو کې وويل چې په دې باندې پوهېږو چې د کابل د هوايي ډګر د ساتنې په برخه کې طالبان ځینې اندېښنې لري، لکه څنګه چې دوی د امريکا سره خبرې وکړې همدغسې موږ به هم د طالبانو سره خبرې وکړو، طالبان چې د امريکا سره په خبرو کې جوړ سول زموږ سره خو به راحت جوړ شي، ترکيه د طالبانو د باور( دين) په خلاف څه نلري له همدې کبله د طالبانو سره به په اسانۍ باندې توافق ته ورسیږي.

تېره ورځ غربي رسنیو خبر ورکړ چې د ترکیې حکومت په پام کې لري د کابل د هوايي ډګر د ساتنې په مسله کې د طالبانو سره خبرې پيل کوي، نن د ترکیې د ولسمشر اردوغان خبرو په څرګنده دغه خبره تاييد کړه چې ترکيه د کابل د هوايي ډګر د ساتنې اړوند د طالبانو سره رسمي مذاکرات کوي.

تر دې وړاندې طالبانو ويلي و چې د ترکي چارواکو سره یې خبرې شوې دي او دغه چارواکو ورته ويلي دي چې بدون د طالبانو له توافق څخه به د کابل د هوايي ډګر په هکله خپل دريځ نه اعلانوي، طالبانو ويلي و چې وروسته دغه خبرې د ترکانو له لوري په یو طرفه ډول ودرول شوې.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More