د امر بالمعروف وزیر د عباس ستانکزي نظر رد کړ وایي تعلیم مباح دی

د طالبانو د بهرنیو چارو وزارت مرستیال عباس ستانکزي نن د ګرځندوی د نړیوالې ورځې په نمانځغونډه کې وویل، تعلیم په نارینه او ښځینه فرض دی، هېڅوک له دې فرضیت څخه انکار نه شي کولی.

عباس ستانکزي د نجونو ښوونځیو د پرانیستلو غوښتنه وکړه.

ستانکزي وویل، تعلیم مطلق فرض او څوک چې یې له فرضیت انکار کوي هېڅ راز شرعي دلیل ورته نه لري پرته له دې چې یا به یې د طبیعت خبره وي چې دا نه منم، یا دا ده یا هغه، خو شرعي دلیل هېڅوک نه لري چې تعلیم فرض نه دی.

بل لور بیا په همدې غونډه کې د طالبانو د امر بالمعروف او نهي عن المنکر وزیر خالد حنفي د عباس ستانکزي نظر رد کړ او ویې ویل، تعلیم فرض نه دی مباح دی او زیاته یې کړه کله چې مباح او د امیر د حکم ترمنځ ټکر راشي نو د امیر د حکم منل واجب ګرځي.

عباس ستانکزي له دې وړاندې هم د نجونو ښوونځیو بیا پرانیستلو لپاره ورته څرګندونې کړې وې، له دې ښکاري چې د نجونو د ښوونځیو پرانیستلو پر سر د طالبانو ترمنځ ژور د نظر اختلافات دي خو د طالبانو زیاتو مشرانو د رسنیو ترمخه ویلي چې دوی د نجونو له تعلیم او ښوونځیو سره ستونزه نه لري.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More